EDITORYAL - EJK sa Sugbo?

Nagsagunson na sab ang mga balita bahin niining mga pagpatay dinhi sa Sugbo nga nakatawag na sa atensyon sa katawhan ug sa ubang mga ahensya sa gobiyerno.

Daw nibalik ang kaniadto nigrabeng mga kaso sa extra-judicial killings sa tungatungang bahin sa katuigan sa 2000 diin matag adlaw adunay dili momenus usa ngadto sa tulo ka mga ‘ex-convicts’ ang gipangpusil patay sa riding in tandem.

Niabot pa gani sa punto niadtong mga tuiga nga pipila sa mga biktima gipaulanan og bala samtang nagbiyahe pa gikan nakapiyansa sa ilang mga kaso.

Karon sa mga bag-ong hitabo, pipila sa mga gipatay adunay mga criminal records o ba kaha adunay mga report nga sila mga nalambigit sa mga krimen sama sa illegal nga drugas ug pagpanulis.

Daghan ang mga pagdudang mga polis ra ang mihimo sa maong mga pagpatay kaniadto, apan walay bisan usa ka polis ang nakasohan o nadakpan nga naghimo sa maong krimen nga diin mitala og kapin 200 ka tawo ang gipamatay dinhi sa Siyudad sa Sugbo.

Karon lahi na ang pamaagi kay dili lang riding in tandem ang naghimo. Ang mga biktima gidagit ayha pa sila gipamatay.

Mao kini ang nahitabo niadtong gipasanginlang notadong tulisan diha sa Talisay City kansang lawas gibitay pa gyud diha sa Mananga Bridge diin daghang mga natalang kaso sa pagpanulis sa nanglabay ng mga katuigan.

Ug ning bag-ohay lang kadtong manag-uyoan kansang mga patay’ng lawas gibiyaan diha sa South Road Properties sa Dakbayan sa Sugbo.

Ang kapolisan namahayag nga walay vigilante group nga naglihok dinhi sa Sugbo. Duna silay gihimong imbestigasyon ug base sa ilang mga pasiunang pagduda posibleng nag-unay unay na ang mga criminal gangs.

Maayo unta og dunay himuong lakang ang kapolisan aron nga mapahiluna ang mga dughan sa mga Sugboanong malinawong nagsunod sa mga balaod nga walay pagkabalaka sa ilang seguridad.