Panahon na pud sa kwaresma

Ang pulong Kwaresma gikan sa Latin nga pulong “Quadregisima” nga nagpasabot og Kwarenta. Kap-atan ka mga adlaw kitang mag-andam sa atong kaugalingon sa dili pa saulogon ang Triduo Paskal nga magsugod Huwebes Santo ug matapos sa Domingo sa Pagkabanhaw.

Sa Balaang Kasulatan, ang Numero Kwarenta o Kap-atan simbolo sa kahingpitan. Sa daang tugon, ang mga Israelita nilatas sa kamingawan padulong sa Yutang Gisaad sulod sa kap-atan ka mga katuigan. Tumong niini ang paglimpiyo sa maong kaliwatan gikan sa mga tawo nga nahimong masupilon sa Balaod sa Dios pinaagi sa iyang sinugo nga si Moises. Ang kayutaan gibanlas sa lunop human sa kap-atan ka mga adlaw sa pag-ulan sa panahon ni Noe.

Ang atong Ginoong Hesus sa wala pa niya sugdi ang iyang kalihukang pastoral iyang giandam ang iyang kaugalingon sulod sa kap-atan ka mga adlaw ug gabii nga walay pagtilaw ug bisan unsang kalan-on. Gani sa maong mga panahon si Hesus gitintal sa yawa ug buot sa yawa nga mahilayo siya sa tumong nga gilatid kaniya sa Dios. Ug gani sa atong kapanahonan karon kun dunay mamatay atong himoon ang pagsaulog niini hangtud na sa kwarenta ka adlaw uban ang mga pamisa ug pag-ampo.

Karong adlawa atong sugdan ang Balansayon sa Santos nga Kwaresma pinaagi sa Miyerkules sa Badlis. Ang pari dunay duha ka mga opsyon sa higayon nga kita badlisan og abo diha sa atong mga agtang.

Ang una moingon siya nga: “PAGHINULSOL UG TUO SA EBANGHELYO!” ang ikaduha;  “HINUMDOMI TAWO NGA SA ABOG KA GIKAN UG SA ABOG KA PAULI!”   Karong adlawa usab gidapit kita sa paghimo og pagpuasa kun makahimo kita (kun wala kitay balatian). Ang dili pagkaon sa kalan-on maoy magtabang kanato sa pagpitol sa atong tawhanong kahilig ingon man ang paghimo sa atong bahin nga atong hinabang alang sa uban nga mas nagkinahanglan pa kay kanato.

Dili lang sa mga butang materyal giawhag sa paghatag kondili diha usab sa atong mga butang nga dunay kalambigitan sa bisan unsang espirituhanon. Hamubo ra gyud ang kinabuhi sayud kita niana mao nga angay nato kining gamiton sa tinarong apan kay tawo lamang kita nan, haguka apan dili lang pud unta kita magpalabi ning maong baruganan. Mahigugmaon ug mapasayloon ang Dios apan sa laing bahin may makiangayon siyang kapungot.

Kwaresma karon busa maningkamot kita sa paghingpit sa atong kaugalingon.