EDITORYAL - US molaban sa Pilipinas

Natubag karon ang dugay nang mga pangutana sa hunahuna sa mga opisyales sa gobiyerno sa Pilipinas ug sa mga yanong mga Pilipino, kun depensahan ba o motabang ba ang Amerika kung atakihon sa taga   laing nasud. Ang tubag, oo.

Mao kini ang pasalig ni US Secretary of State Mike Pompeo atol sa ilang bilateral meeting ni DFA Secretary Teodoro Locsin Jr. didto sa Pasay City.

Ang maong pangutana dugay na kaayong hanap ang tubag bahin sa kasamtangang Visiting Forces Agreement ug Mutual Defense Treaty tali sa Pilipinas ug Amerika.

Si Pompeo miingon nga sakop sa maong mga kasabotan ang West Philippine Sea sanglit parte kini sa dagat Pasipiko.  Adunay tensyon sa WPS tungod sa agresibong mga aksyon sa China nga nakaingon nga wala mahimutang ang mga Pilipino.

Ang MDT tali sa Pilipinas ug Amerika natawo sugod pa niadtong 1951 ug naapil kini sa upat ka importanteng pormal nga pakig-alyansa sa Amerika sa ubang mga kanasuran sa Asya Pasipiko nga gitawag og San Francisco System.

Ang ubang defense treaties sa US mao ang sa Japan, Australia, South Korea ug Thailand. Kaning mga nasura mas lig-on ang militar kun itandi sa Pilipinas. Mao nga managlahi usab ang gidak-on sa mga military exercises nga gihimo sa US kanila matag tuig.

Dili mabasol ang Pilipinas kun nganong gikwestyon ang kapuslanan sa MDT gumikan kay kaniadto ang US dili man mohatag og direkta ug klarong tubag kun motabang ba sila kun gubaton ang Pilipinas ilabi na sa isyu karon sa WPS.

Karon giklaro na ni Pompeo ang direksyon, mahunong na kining mga pagduda bisan pa man og aduna gihapoy diskompiyado.

Apan kun buot gyud subayon, bisan may tensyon ang administrasyong Duterte sa US wala man gyud nila biyai ang Armed Forces of the Philippines kay naa man sila sa gubat batok terorismo, humanitarian missions, ilegal nga drugas, piracy, law enforcement ug uban pa.