Santo Niño ug tablet

Niay pipila ka hinungdan nganong magtubo ang bata sa hiwing paagi.

Lolo ug Lola pulos nahigugma sa ilang bugtong apo. Kutob sa unsay gustong dulaan sa bata gipalit ug gihatag.

Usa ka higayon, gisapot ang bata.

Mihilak pag-ayo. Nag-usdak-usdak ang mga tiil, gibitadbitad ang buhok ug daw gustong pasakita’g toda ang kaugalingon pinaagi sa pagkusi-kumot sa iya mismong panit.

Sigun sa maong lihok nga gipakita sa bata, pagahilantawan sa lolo nga delikadog dili mapanton kining daotang tilimad-on sa kinaiya sa apo, diin ubos sa iyang pangagpas, daw may suicidal behavior.

Gusto siya nga mapakgang kini samtang sayo pa. Busa, sa masuk-anon kunohay’ng tingog iyang giingnan ang bata:

“Di gani ka mohilom ron, bunalan gyud tika!” Pero, hudlat ra!

Pastilan, mosagbat bitaw’g kalit ang lola nga pinasulirap ang mata: “Sige, sulayi kuno!”

Usa ka hapon, ang parking area sa simbahan napuno sa gipangbiling mahalong sakyanan.

Gidili ang paghimo’g playground niini labi na panahon sa misa, diin mokompetensiya ang suliyaw sa bahakhak batok sa undanong homily sa pari.

Gibadlong sa concerned citizen kadtong mga bata nga nagdulag badminton.

Apan naunsa ba, nga gikasuk-an man hinuo’g maayo sa inahan ang concerned citizen? Giiniro pa sa pagsaway: “Nag-serve man ta ka simbahan, unya nganong kusog ka mang mamadlong?” Hala, no?

Sa 4:00pm misa-nobena ni Msgr. Agustin Ancajas didto sa Basilica del Santo Niño sa miaging Enero 12, panahon sa homiliya, iyang gipaambit kadtong usa ka bata nga nagdalag gamay’ng imahen ni Senyor Santo Niño, kinsa nakapaikag sa iyang panan-aw ug nakatandog sa iyang kasingkasing.

Kay matud niya, gitudloan gyud sa ginikanan ang maong bata unsaon pagkat-on og pagmahal, paghigugma, pagsalig ug halawom nga pagtuo ngadto sa Balaang Bata.

Dili sama niadtong usa ka engrandeng kasal nga siya maoy mimisa, diin gikan sa pagsugod hangtod na sa paghuman sa misa, gipasagdan lang sa inahan ang tupad niyang anak nga nagsige la’g duwa sa tablet nga maoy gihimong Ginoo?

Mga kamatuoran nganong ning atong sosyodad karon, daghan ang nagumon sa gidiling drugas.

Unsaon, inay tun-an sa ginikanan ang mga nagtubong bata sa pagsapnay ni Sr. Santo Niño, ang tablet o ubang klase sa gadgets na man hinuoy gipaludha’g gipaampoan.