Tapulado Bridging the gap

Bisan sa kadalanan dili tanang polis nagtinarong sa ilang trabaho. May pipila nga mosugmat gyud ang sakit sa pagkaguwatsinanggo. Dihay estorya kaniadto nga nakahunong lang ang drayber lapas og diyotay sa pedestrian lane, giduol dayon sa polis ug gipangayoag lisensiya. Nangutana ang drayber unsay iyang violation?

Gitudlo sa simod sa polis ang kanhi tuyoktuyok pa nga traffic signal nga didto gipahimutang sa tungatungang bahin sa nagsangang dalan.

“Ang hain ana, Tsip? Kanang signage nga Stop?” Sukna-klaro sa drayber.

“Dili! Kanang naa sa ubos. Kana bang nagngangang lata nga gibitay? Nakakita ka ba?” Medyo may kagahi na ang boses sa polis.

“Aw, bitaw! May lata tuod! Kay para unsa man diay na, Tsip?” “Signal na nga nagpahibalo.” “Nga unsa, Tsip?” “Nga ting-snacks na sa polis.”

May mga drayber nga misugilon diri nako nga ning kahiwian  nga gibuhat sa diyutay, hasta ang kinabag-an sa kapolisan nga nagbinuotan, nadamay. Hinungdan, nga ang panagway sa ilang pagpangalagad nahimong bati ug salawayon sa mga mata sa katawhan.

Inay kasaligan, gilikayan hinuon. Daw makalilisang bul-og sa tubig nga nag-ulang sa kapolisan ug mga sibilyan.

Very aware si CCPO Director Chief Superitendent Royina Garma niining kahimtanga. Dili siya makatugot nga ang maong negatibong reaksiyon sa publiko batok sa iyang kapolisan ug niya, magpadayon.

Nangita siya’g paagi unsaon pagdugtong og usab sa matahom relasyon  sa kapolisan ug katawhan nga hagbay rang nahunlak, human hunlaka sa pipila niya ka guwatsinanggong sakop.

Sayong semana sa Disyembre, mihimo siya’g gimik. Silang taga CCPO, mipahigayon kunohay’g checkpoint, diin kutob sa mga drayber nga ilang matipohan, gipara. Ang mga drayber, kinsa naglibog unsay kalapasan nga nahimo, diin miagi’g hamubong imbestigasyon, daw gituslok ang lubot sa dagom sa labihang kahadlok.

Apan dihang kalit lang gitunolan og bundles of goodies sa polis unya gikantaha’g Merry Christmas, nabag-o ang ilang pagtan-aw sa panagway sa kapolisan.

Dili na kini mga hinanib sa kangitngit nga makahahadlok, kondili, mga buotang anghel  nga milipay kanila  niining paskoha.

Usa ka bridge over troubled water ang gitukod ni Ma’am Royina. Tulay sa gugma nga nakadugtong pag-usab sa dakong kal-ang nga kanhi nakabulag sa kasingkasing sa kapolisan ug katawhan. Pagkanindot sa twist and effect.  Unta, magpadayon!