Sugod na ang dakop

Gihakop gyud bitaw og kahadlok ang mga sakop sa Angkas ug wala na sila mamasahero kay basin og madakpan sila ug ma-impound unya ang ilang mga motorsiklo.

Unsaon, ang kadagkoan sa Land Transportation Office (LTO) nga gipangulohan ni Regional Director Victor Caindec nagsugod na sa pagpanakop sa mga motorsiklo nga gigamit isip habal-habal.

Tungod sa kaluoy, si Mayor Tomas Osmeña mihimo og lakang pinaagi sa pagpagahin og P15 milyones aron nga ipalit og tagsa ka sakong bugas alang sa matag sakop sa Angkas ug mga driver og habal-habal.

Ang mga kontra sa politika sa mayor miingon nga klaro kuno kaayo nga pamolitika kining pagpanghatag og bugas ngadto sa mga driver og habal-habal ingon man sa mga sakop sa Angkas.

Ang tubag ni Mayor Osmeña mao nga “good politics” ang iyang gihimo nga mao ang pagtabang sa mga gidaugdaog.

Buyno, dili gyud ikalimod nga makabentaha gyud si Mayor Osmeña niining iyang gihimo kay ang mga driver og habal-habal mobotar gyud ni Mayor Osmeña kay makuha man niini ang ilang sentimento.

Sa laktud, paabtikay ra gyud ning politika kon kinsay maayo og paagi aron makuha nimo ang sentimento sa mga botante.

Kinahanglan nga ang kampo ni Vice Mayor Edgardo Labella mohimo gyud og inabtik nga paagi aron dili sila mabentahaan.

* * *

Sa miaging semana, nakahisgot ta dinhi kabahin sa text message nga nadawat ni Dr. Paulus Canete nga nagtanyag niya nga bayran og P2 milyones aron isibog ang iyang pagdagan pagka Provincial Board member sa ika-unom nga distrito sa Sugbo.

May nakabasa sa akong lindog nga mi-email nako ug mipasabot nga tinuod gyud diay nga kusog si Dr. Paulus sa mga botante sa 6th district.

Pero pakyas ang mitanyag kang Dr. Paulus nga pasibogon siya sa iyang pagka kandidato, kay sigurado ko nga ang kauban namo sa media dili gyud moatras.

Tambag nako ni Dr. Paulus nga ayaw gyud pagpadala sa dos milyones pesos nga gitanyag kay aron matuman nimo ang imong pangandoy nga makatabang ka sa katawhan.

Kabahin sa pag-atiman sa maayong panglawas sa katawhan ug pagpalambo sa edukasyon maoy nag-unang programa ni Dr. Paulus kon siya mapili sa katungdanan.

Kini maoy angay gyud nga hatagan og pagtagad kay makita ninyo diha sa atong mga public hospitals nga luoy tawon kaayo ang mga kabus.

Isip kauban sa media, daygon nako si Dr. Paulus niining nindot niya nga programa nga gihan-ay na daan. Bisan ako, kon moabot ang higayon nga makahunahuna ko nga manerbisyo sa kagamhanan, ang pag-atiman sa katawhan maoy akong atimanon.