Informer angay natong saludohan

Tungod sa tabang sa publiko, dali ra nga nasulbad sa kapolisan ang pagpatay sa batan-ong babaye nga gidunggab sa makadaghang higayon ug giluglog pa ang liog sa biktima didto sa Barangay Tinago kaniadtong Domingo sa kaadlawon.

Nadakpan sa kapolisan ang suspetsado kay may nitug-an man kanila nga ang ilang gipangita diha ra magtago sa parkinganan og mga trak de karga sa usa ka luna sa North Reclamation Area sa Mandaue City.

Bisan sa pagpanghimakak sa dinakpan nga kuno dili siya ang nagpatay sa biktima, apan ang mga ebidensya lig-on nga makahukom kita nga siya gyud ang kriminal.

Ang mahalong selpon sa biktima na-recover sa kapolisan kay gitugyan kini kanila sa amigo sa suspetsado.

Human diay mapatay sa suspetsdo ang biktima, gikuhaan niya kini sa iyang selpon, ug tingali kuwarta, kay niangkon ang dinakpan nga siya kawatan ug gani nag-atubang pa kini og kaso nga robbery sa hukmanan.

Ang selpon gipatipigan sa suspetsado sa iyang amigo, apan ang iyang amigo nahadlok nga malambigit siya sa krimen mao nga gitugyan niya kini sa kapolisan. Ang testimonya sa amigo sa dinakpan, lig-on nga basehan nga siya gyud ang kriminal.

Nagkadugo pa man gani kuno ang gisul-ob sa suspetsado ug nanghuwam pa kini og sinena kaniya. Nagtuo gyud ko nga naulipon sa drugas kining maong 24-anyos nga suspetsado. Tiaw mo, gidunggab kuno og ka-17 ka higayon ang biktima?

Kining klaseha sa tawo, dili gyud angay’ng kaluy-on kon may mahitabo kaniya diha sa bilanggoan. Daghan ra ba kaayong mga piniriso diha sa bilanggoan nga malooy og mga babaye.

Tagsa ra’y lalaki nga mopatay og babaye, unya gidunggab pa gyud sa makadaghan nga higayon.

Angay’ng pasalamatan kadtong mga sibilyan nga mihatag og inpormasyon sa kapolisan nga misangpot sa makasikop sa maong suspetsado.

Unta, ang inyong gihimo manakod sa uban. Baya kining uban, palabihon nila ang pagpakahilom tungod sa ilang katalawan.

* * *

Nalipay kaayo ko niadtong Martes sa gabii kay nakatabang ko sa pagpahapsay sa trapiko sa eskina Gorordo Avenue ug Salinas Drive (JY Square).

Pag-agi nako sa maong dapit, pwerteng grabeha sa trapik kay wala makasagubang ang usa ka traffic enforcer sa nagpaugat nga mga driver.

Halos dili na moirog ang mga sakyanan kay napuno na ang Junction Box.

Diha nga nakalusot ko sa eskina, nanaog ko og mitabang sa paggiya sa traffic. Gibadlong ang mga PUJ driver dapit sa rotunda nga mohunong bisan og go ang signal, kay magpasakay og mga pasahero.

Matag higayon nga makakita ko og sibilyan nga moabag sa pag-direct sa trapiko, ilabi na kon walay traffic enforcer, moyukbo gyud ko ug mosaludo.