Si Trump ang hinungdan
Ang siyam ka semana nang sunudsunod nga pagsaka sa presyo sa lana gibasol sa mga eksperto sa kabalaka nga magnihit ang kalibotanong suplay sa lana tungod sa pagpahamtang pagbalik sa Estados Unidos sa ekonomikanhong silot batok sa Iran, nga naglakip sa pagdili sa pagbaligya sa iyang lana ngadto sa ubang kanasuran.
Sunod buwan na ang pormal nga pagbanhaw sa ekonomikanhong mga silot batok sa Iran human gibasura ni US President Donald Trump ang nuclear deal sa Iran, sa pamunoan ni kanhi US President Barack Obama ug ubang kanasuran sa kalibotan.
* * *
Di lang kita ang nagping-it sa kataas sa presyo sa lana, nga gipasidaan sa pipila ka eksperto nga mahimong mosulbong pa ngadto sa $100 matag baril.
Nitiyabaw sab ang mga konsumidor sa ubang kanasuran apil na ang mga botante ni Trump sa Estados Unidos.
Tungod sa kabalaka nga mangaparot ang iyang mga kandidato sa midterm elections karong Nobyembre 6 kon magpadayon ang pagmahal sa lana, nidemanda si Trump sa Saudi Arabia sa pagpagawas sa labing daling panahon sa ilang reserba nga 1.6 milyones ka baril sa lana matag adlaw.
* * *
Kay di mang kabalibad ang Saudi Arabia sa Estados Unidos, labi na sa pasidaan ni Trump nga di molungtad ang pamunoan ni King Salman bin Abdulaziz Al Saud og duha ka semana kon bakwion ang Amerikanhong suporta sa ilang seguridad, mapugos gyud pagpagawas sa ilang reserbang lana.
Kon mapugos ang Saudi, mahimong mosunod ang ubang kanasuran sa pagtapak sa gipaabot nga dakong haw-ang nga mamugna kon di nang ka-export og lana ang Iran. Apan seguro na bang mobarato ang lana?
* * *
Ang kahadlok nga namugna sa pagbasura ni Trump sa nuclear deal sa Iran mahimong masumpayan.
Kon hasta ang reserbang lana sa Saudi Arabia ug ubang kanasuran ipagawas na, mahimong mosamot ang kahadlok nga nag-ung-ong ang mas grabeng kanihit sa kalibotanong suplay sa lana.
Mao nga kon mobarato ang lana sunod semana, atong pasalamatan ang pamolitika ni Trump.
Apan kon padayong moburot ang presyo sa lana sa ika-napu nga sunudsunod nga semana, may abunda nga sukaranan ang pagtulisok ni Trump tungod sa iyang pagsugod ug pagpasamot sa kalibotanong kahadlok sa kanihit sa lana.
* * *
- Latest
