EDITORYAL - Tanod magbalantay

Pagsaka sa krimen giingong timailhan sa usa ka lugar nga padayon ang paglambo. Mao kini ang mga pamahayag kaniadto sa mga nangaging mga opisyales sa kapolisan dinhi sa Dakbayan sa Sugbo.

Matud pa nila, kon asa ang economic progress adto sab modagsa ang tanang matang sa mga tawo, adunay mga magnegosyo ug aduna say mga mamentaha, apil niini ang mga kriminal.

Mamahimong may kamatuoran kini nga estorya tungod kay unsa may kawaton o kasuyaan kon didto sa mga hilit nga kabukiran? Unsa may kawilihan sa kinabag-an didto sa kalasangan kon walay negosyo?

Basta diay malambuon ang usa ka lugar ok lang nga adunay daghang mga krimen? Dili kini maayo kay makaguba man usab kini sa imahe sa maong lugar, kadugayan mapul-an usab ang mga tawo ilabi na ang mga negosyante kon pirme silang mabiktima.

Sa Cebu City, giawhag ang mga tanod sa barangay pagtabang sa kapolisan pinaagi sa paghimo og patrolya sa ilang hurisdiksyon. Maayo kini nga paagi aron mamenusan ang mga krimen ginagmay o dinagko.

Kaniadto kon makadungog ang mga bugoy nga nagpadulong ang mga tanod mangahadlok kay tahod kaayo sila kanila. Apan karon, paabuton pa ang mga tanod aron hagiton og sinumbagay. Lahi ra sa karaang panahon.

Tanod ang tawag sa mga magbalantay ug nagpasabot nga sila maoy mosigurong malinawon ang barangay.

Kaning gibuhat sa City Office of Substance Abuse Prevention (COSAP) makahatag og gana sa mga tarong nga mga tanod. Kay mapugos man gyud sila pag-function subay sa ilang kaakohan.

Makapawagtang kini sa ubang mga tanod nga nagpadako lang og tiyan, dawat limpyo, bagis ug tigpasiugda’g binuang sa barangay kay mapugos man gyud sila pagtrabaho. Kaniadto pa man gyud unta trabaho sa mga tanod ang pagbantay sa ilang dapit, apan gumikan kay sagad karon sa mga tanod politically affiliated sa ilang mga kapitan, mao nga usahay dili tuohan sa mga tawo ilabi kadtong sa kaalyado sa kaatbang.