Gubot ang kamada

Kon way kausaban sa kalendaryo sa Commission on Elections alang sa eleksiyon sunod tuig, sugod na sa filing sa certificates of candidacy sunod buwan.

Base sa Comelec Resolution 10420 gitakda ang filing sa COC sugod Oktubre 1 hangtud sa 5.

Sayo ang filing tungod kay gikinahanglan man nga iprinta daan ang mga pangalan sa kandidato diha sa balota.

Kining maong paagi gikinahanglan sa automated counting machine nga maoy moihap sa mga balota.

Apan bisan pipila ka adlaw nalang ang nahabilin sa dili pa ang filing sa COCs nagpabilin pang gubot ang kamada sa politika sa dakbayan ug lalawigan sa Sugbo. Sa dakbayan, si Mayor Tomas Osmeña ug Bise Mayor Edgar Labella pa lang ang klarong managan.

Si Labella ug kanhi mayor Michael Rama maoy giingong magpares apan si Osmeña wala pay gipahibawong runningmate.

Ang katapusan niyang pahibawo mao nga iyang gipilian silang Konsehal Dave Tumulak ug Mary Ann delos Santos. Ang duha ka grupo pulos wa pay gipahibawo nga kumpletong han-ay sa ilang mga kandidato.

Daghan hinuon ang nagtahap mahinayon ba gyud ang Labella-Rama nga tandem. Kini tungod kay si Labella sakop sa PDP-Laban samtang si Rama dili membro sa partido. Makaintriga sab ang nahitabo sa rally niadtong Domingo didto sa Plaza Independencia tungod kay wala gyud tugoti nga makapatong sa entablado ang kanhi mayor.

Nakit-an hinuon siyang mitambong sa misa apan wala gyud siya hatagi og bahin sa programa nga gitumong pagsuporta sa kampanya sa kapolisan batok sa ilegal nga drugas.

Ang mga kasaligang tinubdan mitug-an nga kini tungod kay di gyud gusto ang mga opisyal sa PDP-Laban nga mahimong kabahin si Rama sa ilang grupo. Gihimakak hinuon kini ni Labella.

Pero kon tinuod nga mao ni sentimento sa nasudnong opisyales sa partido, unsa kahay mahitabo sa ilang kampanya kon mahinayon ang Labella-Rama tandem?

* * *

Sa probinsiya, posibleng magsakbang sila si Gobernador Hilario Davide III ug Kongresista Gwen Garcia. Pulos pa sab way klaro kinsay ilang mamahimong runningmates.

Si Davide buot unta nga magpares sila og balik ni Bise Gobernador Agnes Magpale apan nibalibad ang naulahi kay gusto na siyang moretiro sa politika. Duna hinuoy mga estorya nga posibling molansar siya pagkagobernador.

Kon kini mahitabo alegre ang piniliay sa probinsiya apan siguradong di malipay si Davide niini.

Sa pikas bahin gidungog nga si Kongresista Benhur Salimbangon sa 4th district ang posible nga mamahimong tandem ni Garcia.