Pag-ilis sa tanang polis di mao ang sulbad

Giangkon sa walo ka badlongong polis sa Talisay City nga ang 15 ka sachets sa shabu nga nasakmit sa mga ronda nga gihimo sa Regional Mobile Force Batalion (RMFB) 7,  lima niini ilang gikuha dihang mipalag ang mga arresting officers  nganong 10 ka sachets ra man ang  gisumiter  ngadto sa Crime Lab 7.

Apan nangatarongan ang walo. Wala kuno nila kawata. Gitagoan lang. Pastilan, pareha man ning rasona sa usa ka bana, kinsa bisa’g nasakpan na sa asawa nga nagpatong  sa kerida, miingon lang gihapon ang dukirok, nga dili na ako, ha?

Mao man ni ang kinaiya sa mga linalang nga nagumon sa daotang binuhatan. Ang dili gyud motug-an sa tinuod. Morag uwak. Bisa’g nakit-an nang nagtangag og piso, moingon gihapon: “Waaa...Waaa!”

Gumikan sa walo, napagan ang tanan. Hasta mga nagbinuotan sa ilang trabaho ug mipakita’g exemplary performance gikuha sa Camp Crame ug giilisa’g bag-ong panon sa mga batan-ong  polis.

Wala kaha masayop ang Camp Crame ning ilang diskarte? Sigurado ba sila nga kining tanang bag-ong polis nga ilang gipadala sa Talisay City pulos na mga buotang karnero ug walay itom kanding nga nasagol? Nindot man gud kon lunlon mga karnerong polis ang madestino kay mosunod gyud sila kutob sa unsay ipabuhat sa ilang agalon subay sa tinarong nga paagi. Dili sama sa kanding, nga hasta amo, unayon sa pagsungay!

Kon ikatandi pa sa usa ka bangan nga saging kadtong gipangpulihang mga polis sa Talisay City, pipila lamang kanila ang dunot. Mas daghan ang hinog sa punoan nga wala madutli sa hait nga mga ngipon sa kuwaknit ug kabog – mga hayop nga malipayong nagpakabuhi sa kangitngit. Lig-on ang kasingkasing sa maong mga polis. Dili malum-it ang uniporme sa yawan-ong gahom sa shabu.

Busa para nako, ang mga dunot ray angay ilabay sa basurahan. Ang mga maayo, dapat ibilin aron ang katam-is sa ilang pagpangalagad matilawan gihapon sa siyudad nga nanginahanglan. Basta, kutob nga may madunot sa grupo, laksion gyod kini ug isugnod sa hudnohan.

Dili epektibo ang pag-revamp ug pagtaktak lang nila sa serbisyo. Kon dili prisohon gyud sa tukmang gidugayon base sa unsay salaod nga nahimo.