Ayaw’g kumpiyansa sa gihimo sa China

Midagsang pag-ayo karon dinhi sa nasud ang mga gipangbaligya nga motorsiklo nga hinimo gikan sa China. Barato ra gyud tuod, mao nga daghan ang nadani sa pagpalit.

Usa niini mao kining motorsiklo. Awhagon nako kadtong gusto nga mopalit og motorsiklo nga mas maayo pa nga modiretso na lang kamo pagpalit og mga “branded” nga matang sa motorsiklo.

Barato ra gyud tuod ang pagpalit nako niining maong motor kaniadtong 2008. Tulo ka tuig nako nga gidatahan sa kantidad nga P1,240 ang buwan.

Apan giilad ko kay ang piyesa sa Honda, sakar ra kuno kon magkinahanglan ko og pyesa panahon nga maguba.

Karon, naguba na ang motor ug nagkinahanglan ko og mga bearings.

Nahurot ko na lang pagsuroy ang mga baligyaanan og piyesa sa motor dinhi sa dakbayan sa Sugbo ug sa Mandaue, wala gyud. Pulos lingo-lingo ang mga tindero.

Barato ra unta ang maong mga bearings, apan ang problema kay walay mapalit.

Lain ang iyang sukod kay sa mga motor nga sagad makita nato nga nagdagan. Mao nga nakahukom ko nga pahimatngonan kamong gusto nga mopalit og China-made nga mga motorsiklo.

* * *

Abi ninyo og unsay akong gihimo? Kinahanglan gyud ko nga mopalit og junk nga motorsiklo nga pareho og makina sa akong motor, aron kuhaan og piyesa ug maoy magamit.

Nakakita ko og mga junk nga motorsiklo, pero abi ninyo og tagpila ang baligya? P8 mil kay tibuok man sab nga motorsiklo ang ibaligya.

Ingon niana ang grabeng kahasol nga akong nasugatan. Aw, hinoon, sa sunod, may makuhaan na ko og piyesa kon maguba na sab ang akong makina.

Kon mamaligya unta sila nianang mga China-made nga motorsiklo, kinahanglan sab unta nga may tindahan sila nga namaligya og mga piyesa niini aron nga dili masakripisyo ang mga mopalit sa ilang baligya.

* * *

Usa ka opisyal sa kapolisan nga nadestino sa Cebu City Police Office (CCPO) mikumpirmar nga ang rason nga kiyugpos ang mga polis ug wala gyud manakmit sa mga video karera, moli-moli ug manakop sa mga nalambigit sa illegal swertres, kay nagdawat gyud diay ang uban kanila.

Kay bilib man gyud ko ni CCPO director Royina Garma, hagiton nako siya nga mohimo og tinuoray nga kamandoan sa iyang mga hepe, ilabi na diha sa Station 5, Station 6, Station 3 nga puhagon ang mga ilegal nga sugal.

Unya, paninglan niya ang mga hepe kon gituman ba ang iyang mando.      

Kon dili kini mahimo ni Garma, makaingon ko nga pili-pili ra diay ang iyang kampanya, gipasagdan ra ang sugal ug ang nakadaot kay gi-report nga nakakuwarta niini ang daghang polis.