Kakak

Gikonsiderar karon ni Presidente Rodrigo Roa Duterte ang pagkanaug sa katungdanan tungod sa iyang pagkadismaya sa wa gyud masulbad nga suliran sa gidili nga drugas ug kurapsyon.

Kahinumdoman nga gisaad ni Duterte ang pagsulbad sa suliran sa gidili nga drugas ug korapsyon sulod lamang sa unom ka buwan human siya makalingkod sa Malakanyang apan kapin na siya sa duha ka tuig nga naglingkod nagpabilin pa gihapon ang suliran. Makapadismaya gyud tinuod.

Apan ang pamahayag sa presidente maingon ba nato nga pagkakak sa gilusad niyang gubat batok sa gidili nga drugas ug korapsyon?

Kon seryoso man ang pahayag sa presidente mikakak ug kapildihan na kini sa gilusad niyang gubat batok sa drugas ug kurapsyon. Tungod niini naglayat-layat ug miabot tingali sa ilang dunggan ang ngisi sa mga nagpalusot ug gidili nga drugas ug ang mga kurakot.

Kon seryoso ang Presidente sa iyang pahayag gibudhian niya kitang misuporta ug miuban sa gilusad niyang gubat batok sa gidili nga drugas ug kurapsyon. Gipasubo ‘ta sa Presidente ug gibiyaan sa tunga-tunga sa pagpakig-gubat.

Hinuon adunay mga kondisyon ang Presidente sa iyang gikonsiderar nga pagkanaug sa katungdanan ug kini kon ugaling modaug sa iyang election protest si kanhi Senador Bongbong Marcos batok kang Bise Presidente Leni Robredo.

Sa akong pagsabot ang presidente dili mokanaug sa katungdanan kon dili modaug si Bongbong Marcos sa iyang election protest batok ni  Robredo tungod kay wa siyay salig niini ug dili makamao.

Tungod niini posibleng magpabilin si Duterte sa Malakanyang hangtod mahuman ang iyang termino gumikan kay sayod kita unsa ka langay ang election protest dinhi sa nasud.

Unya kon mahukman na man duha o usa ka buwan na lang ang nahabilin sa termino.

Busa awhag nako sa Presidente bahalag dismayado ka sa resulta karon sa dagan sa imong kampanya batok sa gidili nga drugas ug kurapsyon padayon lang gihapon kay modaug ra gihapon ka sa kadugayan.