Polis nga kahibulongan
Gipagawas sa Police Regional Office sa Central Visayas ang service record ni PO3 Eugene Calumba, nga napatay atol sa giingong pagsuway pagbanhig ni Barangay Konsehal Jessielou Cadungog sa Tejero, Cebu City niadtong Hulyo 30, aron pagpakita sa daghang pasidungog nga iyang nadawat sukad sa pagsud sa kapolisan napu ka tuig na ang nilabay.
Apan wa lang tuyoa naapil ang listahan sa nagkalainlaing units nga iyang nadestinohan. Nga labihan katalagsaon.
Ug inay makapapas nakapasamot na hinuon sa mga pagduda nga gisugo sa iyang kadagkoan si Calumba pagpatuman og di kasarangan nga mga operasyon sa kapolisan.
* * *
Sa niaging siyam ka buwan, kasiyam sab ibalhin-balhin og destino si Calumba.
Normal ba alang sa usa ka polis nga ibalhin og bag-ong unit sa hapit matag buwan?
Sa kaso ni Calumba, may mga adlaw pa gani nga gidestino siya og duha ka managlahi nga dapit sa usa lang ka adlaw:
• Niadtong Oktubre 9, 2017, tulo ka buwan human nakabanos si Presidente Rodrigo Duterte sa Malakanyang, gidestino si Calumba sa Camp Sergio Osmeña Sr., ang headquarters sa PRO 7 nga nahimutang sa Dakbayan sa Sugbo, ug sa headquarters sa Negros Oriental Provincial Police Office (NOPPO) nga nahimutang sa Kampo Francisco Fernandez sa Sibulan, Negros Oriental; ug
• Niadtong Hunyo 4, 2018, gidestino siya sa PRO IV-A (Calabarzon) kansang headquarters nahimutang sa Camp Vicente Lim sa Calamba City, Laguna ug sa Camp Sotero Cabahug, ang headquarters sa Cebu City Police Office (CCPO).
* * *
Labaw’ng makapahibung mao nga sa bisperas sa adlaw nga gilista sa iyang service record nga pagkabalhin sa bag-o niyang destino, may duguong panghitabo nga naglambigit og inilang mga personalidad:
• Usa ka adlaw sa wa pa mabalhin sa Bacong, Negros Oriental niadtong Oktubre 10, 2017, gipatay og riding-in-tandem ang sakop sa Pamilyang Teves;
• Usa ka adlaw sa wa pa mabalhin sa Cebu Provincial Police Office (CPPO) niadtong Marso 22, 2018, gipatay si kanhi Talisay City Councilor Emil Go; ug
• Usa ka adlaw sa wa pa madestino sa CCPO Headquarters, may girakrakan sa parking lot sa Infinity KTV nga gipanag-iya ni Peter Lim, ang gipasanginlan ni Presidente Duterte drug lord, ang sakyanan sa manghod ni Lim nga si Wellington.
* * *
- Latest
