Bahad

Taliwala sa sunod-sunod nga kaso sa pagpatay dinhi sa dakbayan sa Sugbo, diin sagad sa mga biktima gikatahong dunay kalambigitan sa ilegal nga drugas, mitumaw ang hulga sa hepe sa kapolisan sa dakbayan ngadto sa mga nalambigit sa ilegal nga drugas.

Si Senior Superintendent Royina Garma nipasidaan sa mga protektor sa drugas nga mokagiw, kon gusto silang magpabiling buhi. Matud ni Garma nga dili na luwas puy-an ang dakbayan sa Sugbo alang sa mga durugista ug sa mga protektor niini.

Giluwatan ni Garma ang maong pamahayag human sa pagpusil patay kang konsehal Roel Mabano sa Barangay Kalunasan ug kanhi konsehal Glenn Mark Manal sa Barangay Lorega-San Miguel. Ang duha pulos giingon nga nalambigit sa patigayon sa drugas.

Nabalaka ko nga tungod sa pamahayag ni Garma mas mosamot ang pagduda nga dunay nahibaw-an ang kapolisan sa mga kaso sa pagpatay dinhi sa dakbayan, o ba kaha sila ra sab maoy naghimo niini.

Angayan unta nga likayan sa mga opisyal ang mga pamahayag nga ingon niini tungod kay makasamot ni sa pagduda nga sila maoy nagpaluyo sa pagpatay sa mga gidudahang nalambigit sa drugas.

* * *

Apan mas labaw’ng makapabalisa ang kamatayon sa usa ka kwatro anyos nga batang lalaki didto sa Barangay Ermita human maigo sa saag nga bala.

Si Blader Skyler Abatayo nagtuon ni sulod sa iyang lawak dihang naigo sa saag nga bala nga gidudahang gikan sa armas sa kapolisan nga nangangkong may anti-drugs operation sa maong dapit atol sa maong higayon.

Gihimakak sa kapolisan nga sila maoy responsable. Wala kuno sila kapabuto sa ilang mga armas. Ilang gipasanginlan ang mga durugista nga subject sa ilang operasyon nga maoy namusil ug nakaigo sa bata. Apan wala gyud sila’y detalye nga gihatag kinsa ang ilang subject sa buy-bust.

Kon tinuod nga inosente sila sa nahitabo, nganong dugay man kaayo silang mipaubos sa paraffin test ug misubmiter sa ilang mga armas alang sa ballistic exam? Ang angayang gihimo sa kadagkoan sa kapolisan human sa hitabo, mao nga gidis-armahan dayon ang tanang nalambigit sa operasyon ug gipaubos sa ballistic exam ang ilang mga armas.

Sa ingon niini, malikayan unta ang pagduda sa kredibilidad sa resulta sa ilang imbestigasyon. Ang tanang naapil sa operasyon angayang ipaubos sa retraining ug kadtong masakpang butalo, dis-armahan sa hingpit, o ba kaha tirador maoy angayang ihatag niya.