Patuyang lang og panakop

Ang anak nakong nutritionist ug dietician nga sakop sa medical team sa Cebu Provincial Health Office, mipaambit sa nasugatan niyang bati kaayong kasinatian samtang nagdrayeb siya sa iyang sakyanan didto sa dalan Molave sa Lahug kaniadtong Hulyo 5.

Kalit lang siyang gipara sa usa ka traffic enforcer bisan og wala siya makahimo’g salaod. Mga alas 7:50 sa gabii kadto ug gikuwestiyon siya sa traffic enforcer bahin sa iyang headlight kay hinay ra kuno ang siga nga iyang gi-dim.

Ang maong sakyanan updated sa maintainance. Gamay’ng deperensiya, ipaayo gyud dayon. Labi na og suga ang punder, ilisan gyud dayon. Gani, niadtong higayona, usa pa lang ka adlaw gikan nga kini gipa-general check-up, ug gipa-change oil.

Apan naunsa ba, nga giisyuhan man gyud sa traffic enforcer og citation ticket akong anak sa rason nga mora kuno og gaduka ang siga sa suga. Gipangutana sa akong anak ang enforcer kon anaa ba diay sukod ang gikusgon sa siga nga maoy gustong makita sa enforcer. Wala makatubag ang enforcer.

Ultimong nanan-aw sa maong dapit, mimatuod gyud nga wala man gyuy deperensya ang mga suga sa REVO sa akong anak. Unya, dihang gitan-aw sa traffic enforcer ang rehistro, misurangsurang pa pagpangutana kon dili ba gray ang kolor sa sakyanan, kay ang nabutang sa rehistro itom man.

Kalmado gihapon kini nga gitubag sa akong anak nga itom ang kolor sa sakyanan, base sa nabutang sa rehistro. Ang citation ticket nga giisyu, gibutang nga defective headlight bisa’g wa gyu’y deperensiya.

Ang nagpirma niini mao ang usa ka traffic enforcer Maano. Gipabayad gyud og P500 ang akong anak didto sa ilang opisina sa violation nga ang traffic enforcer ra’y naghimohimo.

Unya, maayo kaha ning gihimo sa imong gipangladlad nga traffic enforcers sa kadalanan, Mayor Tommy Osmeña? Dili ba, dakong pag-abuso sa nahuptang gahum ang pagpahamtang og salaod sa inosenteng citizen bisa’g walay sala? Ato ning paimbestigahan, mayor, uy.