Balana sa oposisyon

Inanay na gayud nga naklaro ang kamada sa politika.

Kini human nideklara si Cebu City Vice Mayor Edgardo Labella sa iyang interest pagdagan alang sa pagkamayor niining dakbayan sa midterm elections sa Mayo sa sunod tuig.

Niining maong kalamboan, delikado nga maintimano gayud nga mabuak ang oposisyon sa dakbayan.

Daan na nga nianunsiyo si kanhi mayor Michael Rama sa iyang interest pagdagan pag-usab alang sa labing taas nga posisyon sa siyudad sa sunod piniliay.

Tungod niini, mora og padulong sa pagkayagaw ang oposisyon kon tinud-on gayud ni Labella ug Rama ang ilang intensiyon.

Hinuon sa mga panghitabo karon, klaro nga adunay seryusong balana ang relasyon ni Labella ug Rama.

Kon dili magkahiusa ang PDP-Laban ug Barug Team Rama, dili na ikatingala pa kon mamunbon sila sa adlaw unya sa eleksiyon, ug si Mayor Tomas Osmeña ug ang Bando Osmeña Pundok Kauswagan maoy adunay katapusan nga katawa.

Alang sa mga tigpaniid sa politika, mas maayong usa lang kanila ni Labella ug Rama ang mosibog aron nga mas adunay tsansa ang oposisyon batok kang Osmeña ug BOPK. Apan kon si kinsa sa duha ang mosibog, dako kana nga pangutana karon.

Tali kang Labella ug Rama, mas adunay dakong purohan si Labella batok kang Osmeña.

Limpiyo ang iyang personalidad nga wala gayud kini nalambigit sa unsa man nga seryusong anomaliya ug aduna kini karisma nga mohakot og daghang botos.

Apan lahi ang sitwasyon ni Rama, kansang political career ang nagtakilid na karon.

Kini human usab sa akusasyon ni Presidente Rodrigo Duterte nga usa kini sa mga lokal nga opisyal kaniadto nga nalambigit sa negosyo sa ilegal nga druga.

Bitaw, sa akong tan-aw mas maayo pa nga si Rama na lang ang mosibog pabor ni Labella.

Kini aron pagsalbar sa oposisyon gikan sa pagkabungkag unya niini kay kon iyang ipalabi ang iyang politikanhong interest ug mosutoy gayud siya sa iyang kandidatura, walay nada ang kamada sa oposisyon sa umaabot nga piniliay.