Man is polygamous

By nature, man is polygamous. Di gyud makontento’g usa. Gusto gyu’g daghan. Gusto gyu’g motilaw ug makatilaw og lainlaing putahe. Kon mahimo, gustong angkonon tanang chicks nga iyang makursonadahan. Mao nga sa kaminyoon, halos tanan moagi gyog dakong bagyo sa kinabuhi, oras nga masakpan sa asawa nga nangabit iyang bana.

Hinuon, may mga asawa nga nagtuo ilang bana buotan. Kay sa ilang panag-ipon wa gyud kuno mo-left turn.  Ang wala nila mahibaw-i, nga ilang bana magsudlanan diay’g kasa, linggam spa ug massage parlor nga mibaligya og  mga dirty fun.

Sa haysikol pa mi, dinhay edaran nga manyakis, kinsa mitudlo namo’g binuang. Niya pa, ay: “Kon kamo maminyo na, unya masakpan mo sa inyong asawa sa akto, ayaw gyu’g angkon nga ikaw na. Ingna, nga dili ni ako. Dili ni ako!”

May tag-iya’g beerhouse nga kanhi  sa estudyante pa ko sa kolehiyo adto ko magkan-anan sa ilaha, mipaambit sa iyang kasinatian. Matud niya, kutob sa mga waitress nga iyang matripan, iya gyung matilawan. Kay iyang prinsipyo, “kuyaw kaayo ka’g tunglohon sa imong armas kon adto ra nimo kini isal-ob sa usa ka sakoban. Kinahanglang magtener ka’g daghang sakoban nga kabalhinbalhinan nimog hal-ob!”

Duna puy mga amahan, nga bata pa gani ilang anak, ila nang tudloan: “Uy, Dodong, ayaw gyud pag-stick to one. Kay sagad sa nag-stick to one, naghikog! Pagtagbaw gyud sa imong pagkaulitawo una ka magminyo.  Tilawi ang tanan nga gusto nimong tilawan samtang wala ka pay kabilinggan. Sunda ko, nga sa ulitawo pa, ubay-ubay gyong bulak natuhog.”

Daghang seminarista nga panahon sa Regency Period, ubay-ubay ang wala na mobalik sa seminaryo. Kay sagad nila, natintal gyud sa pag-ukit sa laming mansanas nga gidili sa Ginoo. Ug duna gyoy mga pari, nga migawas sa pagkapari kay nagminyo.

Gani, may pari sab nga miapil sa politika, diin dihang midaog natintal sab sa katahom ni Eba. Unya ang usa ka Eba, napun-an pag lain. Ang pari nakalimot nga nakigminyo na siya sa atong Ginoo ug ning iyang gibuhat sama ra nga giluiban niya Siya. Kinaiya sa tawo nga magmatuod nga man is by nature polygamous.