Dakong linog
Makalilisang kini nga warning sa otoridad dili pa lang dugay nga kinahanglan gayud mangandam ang mga Sugboanon, ilabi na niadtong mga nagpuyo sa Metro Cebu, sa dako nga linog nga mohapak unya sa lalawigan. Ug kinsa ba’y dili malisang niana?
Atol sa katiguman sa niagi nga semana, mipasidaan ang mga disaster expert nga posible nga adunay kusog nga linog nga mokusokuso sa Sugbo. Ang ilang giingon nga ang kusog nga pagtay-og moabot kuno ngadto sa Magnitude 7, susama sa mihapak sa Bohol kaniadtong 2013.
Matud pa sa usa ka eksperto gikan sa Philippine Institute of Volcanology and Seismology, wala pa makasinati ang Sugbo og makusog nga linog sulod sa 500 ka tuig. Ug posible kuno nga adunay dako nga enerhiya nga natigum karon sa ilawom ug nga nagpaabot nga mobuga kon molihok na ang fault line.
Hinuon, dili na nato ikatingala pa ang mga linog dinhi sa Pilipinas. Kini tungod lagi kay ania ang atong nasud nabutang sa gitawag og ‘Ring of Fire’ dinhi sa Pasipiko, diin mahitabo ang mayoridad sa mga dagko nga linog ug pagbuto sa bulkan sa kalibutan.
Gani dinhi sa Pilipinas, nakasinati na kita og kusog nga mga linog diin liboan ka kinabuhi na ang nakalas. Siguro nakahinumdom pa kamo niadtong dako nga linog nga miigo sa Baguio City nga mipatay og gatusan ka tawo subra sa 20 ka tuig na ang nakalabay.
Dinhi lang sa Kabisayaan, duha ka dagko nga mga linog ang mitay-og sa niagi nga katuigan. Una, didto sa Negros Oriental nga mimugna og grabe nga kahadlok sa hulga sa tsunami. Ug kinsa’y makalimot sa dako nga linog didto sa Bohol nga mipatay usab og gatusan.
Karon, unsa kaha ka andam ang mga Sugboanon pag-abot na unya sa dakong linog? Kining ako dili usa ka pagpanghadlok. Mitumaw lang kining mao nga pangutana taliwala sa pasidaan sa otoridad mahitungod sa usa ka kusog nga linog nga angay pangandaman sa tanan.
Mas maayo nga kanunay kita nga andam aron nga mas menos unya ang kadaot sa kabtangan ug nga dili maratsada ang daghan nga kinabuhi sa katawhan kon mohapak na unya ang ‘Big One’ dinhi sa probinsiya.
- Latest