Aron dali ra makalisensya

Tungod tingali kay daghan man ang nasayod nga nahimo ko kaniadto nga deputized agent sa Land Transportation Office (LTO), daghan ang magpakisayod nako kon unsaon nga dali ra sila makakuha og lisensya.

Usahay gud, makapanglingulingo na lang ko, ilabi na nga ang uban gusto nga magpatabang nako. Tinuod, mga higala nako ang mga opisyal sa LTO, apan maikog ko nga mohangyo kanila.

Ang anak nako nga architect, hangtud gud karon wala pa siya makakuha sa iyang plastic driver’s license kay maikog ko nga mohangyo sa mga opisyal sa LTO.

Buyno, agi og tabang kaninyo nga gustong mokuha og lisensya sa pagmaneho og sakyanan, ingon niini ang inyong buhaton. Ang tinuod, daghan gyud kaayo ang mo-transact diha sa LTO Cebu City.

Sa mga LTO satellite office, arang-arang og gamay, apan daghan gihapong tawo nga magpunsisok sa buntag hangtud udto. Ang akong tambag kaninyo, adto mo sa LTO-SM sa hapon.

Ingon usab niini ang inyong buhaton diha sa LTO-Robinsons Fuente ug sa LTO District Office sa Mandaue nga nahimutang sa JCenter Mall. Mingaw na kaayo sa hapon kay wala na may tawo nga moadto aron pagkuha og lisensya.

Alas sayes sa hapon pa man gud mo-off ang LTO sa mga mall, mao nga bisan gani kadtong mga nagtrabaho, makahimo pa sa paglukat iniggawas nila, basta magdali lang.

Sa LTO Robinsons’ Fuente gyud kay matud sa usa ka pari, kapin oras lang mahuman na ang transaksyon kay wala kaayo’y tawo. Maayo pa sa mall kamo mo-transact og business kay bugnaw, dili pa kamo panington.

Akong awhagon si higalang LTO-7 regional director Vic Caindec nga basin ma-aircon sab unta ang licensing or registration section sa Cebu City, amigo.

* * *

Hangyuon nako ang mga konsehal sa Team Rama nga suportahan unta nila ang gisugyot nga ordinansa nga magtugot sa mga traffic enforcers sa CITOM nga makasakmit na og lisensya sa mga driver nga makahimo og salaod.

Nakabantay man gud ko nga sige lang ang mga konsehal sa Team Rama, ako ra nga mga higala, nga mopauswag sa pag-approve sa gisugyot nga ordinansa nila ni Konsehal Margot Osmeña ug Jun Gabuya.

Nindot man gud ni nga ordinansa kay mao kini ang makapahadlok sa mga driver sa pag-abuso. Karon gud, dili mahadlok ang mga driver kay traffic citation ticket ra man ang ilang gigamit ug dili masakmit ang ilang lisensya.

Palihug, lang mga amigo.