Unsay apelyido nga angay’ng gamiton sa batang illegitimate?

Dear Atty. Divine,

Duna ko’y pangutana may labot sa apelyido sa akong pag-umangkon. Dili kasal ang akong igsuon ug ang amahan sa bata. Sa dihang nanganak ang akong igsuon, ang amahan sa bata tua sa abroad ug this year pa mouli.

Nagsuporta hinoon siya sa bata, apan tungod kay dili siya makapirma sa birth certificate, ang apelyido sa inahan sa bata ang among gigamit sa Birth Certificate sa akong pag-umangkon.

Ang akong pangutana kon lakip ba ang middle name sa akong igsuon ang gamiton sab sa bata? Kon mouli na ang amahan mahimo ba nga mausab ang apelyido sa bata ug gamiton ang apelyido sa amahan? Daghang salamat. —  Rhina

Dear Rhina,

Samtang wa pa ma-recognize sa amahan ang bata, hayan ang apelyido sa iyang inahan gyud una ang gamiton sa birth certificate sa bata apan wala siya’y middle name.

Kini base sa mga nangaging desisyon sa Korte Suprema nga  nagkanayon ang illegitimate nga bata nga mogamit sa apelyido sa iyang inahan kinahanglang wala’y middle name.

Apan kon siya i-recognize na sa amahan, then mahimo siya nga mogamit sa apelyido sa amahan ug ang apelyido sa iyang inahan maoy iyang middle name.

Busa kon mouli na ang amahan sa bata, mahimo siyang mo-execute og Affidavit of Acknowledgment with Consent to Use His Surname ug iyang i-submit ngadto sa Local Civil Registrar diin marehistro ang bata aron mausab ang apelyido sa bata sa iyang birth certificate. Thanks and God bless.- Atty. Divine

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong  tubagon ang inyong pangutana pinaagi sa akong column matag Miyerkules, Sabado ug Domingo.