Angayan lang
Gumikan sa pagpabaya ug pag-abuso, nahukman sa nasudnong kagamhanan ang pagpasira sa iladong dapit kaligoanan sa nasud. Ang abuso sa mga negosyante sa baybayon ug dagat sa Boracay, nasuta human sa gihimong pakisusi sa mga opisyal sa Department of Environment and Natural Resources (DENR), ug ubang ahensiya sa gobiyerno.
Mga hugaw nga gikan sa mga hotel ug resorts sa Boracay, gilabay ra diritso sa dagat pinaagi sa dagkong mga tubo. Gawas niini, gitukoran usab og mga building ang sulod sa 30 metros nga gilay-on gikan sa baybayon, bisan pa og supak kini sa balaod. Ang 30 metros gikan sa baybayon, ug ang baybayon ug dagat iya kini sa gobiyerno ug dili kini mapanag-iya og pribadong tawo.
Tungod niini, gimando ni DENR Secretary Roy Cimatu nga gub-on ang mga building nga gitukod sulod sa 30 metros gikan sa baybayon. Wala supaka sa mga negosyante nga nanag-iya sa building ang kamandoan ni Cimatu, apan nihangyo sila sa nasudnong kagamhanan sa dili lang pagpasira sa hingpit sa mga resorts sa Boracay. Ang lokal nga kagamhanan sa Boracay hakog kaayo sa salapi nga ilang makolekta gikan sa mga nagnegosyo og resorts sa ilang dapit. Ang ilang kahakog maoy nakapabuta kanila hinungdan nga gipasagdan ra nila ang pag-abuso sa mga negosyante sa isla sa Boracay.
Ang building nga nanubo sa isla sa Boracay dili mga tungaw nga tungod sa kagamay, halos dili nimo makita. Ang mga building dagko ug imposible nga dili makita sa mga opisyal sa Boracay dihang kini gitukod ug gipabarug. Tungod sa kitaon sa lokal nga kagamhanan sa Boracay gikan sa mga negosyante nga magnegosyo, nagpabuta-buta sila.
Sa dakbayan sa Lapu-Lapu ug ubang dapit sa Sugbo, mga buta pud ang mga lokal nga opisyal niini kay wala sila makakita sa mga building nga gitukod sulod sa 30 metros gikan sa baybayon o lapyahan sa dagat. Bisan gikural na ang agianan paingon sa dagat, wa gihapon sila makakita niini.
- Latest