Walking excavator

Dili malalis nga ang dakbayan sa Sugbo nanginahanglan gyud og kahimanan nga magamit sa pagpalawom sa atong kasapaan aron nga malikayan ang pag-awas sa tubig kun kusog ang ulan.

Atol sa termino ni kanhi mayor Michael Rama, ang dakbayan sa Sugbo mopalit unta og amphibian excavator nga makakanaog sa kasapaan ug mokandos sa lapok aron molawom ang sapa, apan wala madayon.

Nindot unta gani ang excavator nga paliton sa siyudad kay kadto man nga dunay upat ka tiil, unya mahimong molakaw nga siya ra. Kapin sa P21 milyones ang kantidad sa mao nga “walking excavator” nga paliton.

May contractor na gani unta nga nakontrata ang dakbayan aron maoy mokumpra niini ug moasikaso nga mapadala dinhi sa Sugbo ang mao nga kahimanan.

Ang nakaproblema lang kay dugay kaayo nga naasikaso ang gikinahanglang papeles nga mao ang pagpangayo og tax exemption gikan sa Department of Finance aron dili modako pagsamot ang bayranan.

Tungod kay nadugay man ang pagpalit, naabtan kini sa pagsaka sa prisyo ug misubra na sa gigahin nga kantidad. Hangtod karon, wala na gyud mapalit ang maong kahimanan.

Gikinahanglan kini kaayo kay hapit tanan sa atong kasapaan mabaw na kaayo mao nga kun dunay uwan, mosugwak na ang tubig ug molunop sa karsada.

* * *

Mosuporta ko nga tugotan ang paggahin og bisan usa ka hektareya diha sa karaang Inayawan Sanitary Landfill aron gamiton sa dakbayan nga transfer station.

Kana kun ang kontrata sa City Hall ngadto sa private hauler sa paghakot sa atong mga basura, mobarato sab. Kinahanglan gyud nga menosan ang kantidad sa kontrata kay karon, ang contractor man ang mibayad og transfer station nga adto idiskarga sa mga garbage truck ang basura.

Ang balaod gud naglatid man nga sa dili pa ilabay ang basura sa landfill, kinahanglang buwag-buwagon ang mga madugta ug dili madugta. Kay sagad man sa basura nga makolekta sa mga garbage truck wala man kaayo ma-segregate, adto sa transfer station himoa ang paglahi-lahi sa basura.

Angay lang nga dili unta supakon sa mga konsehal nga alyado sa Team Rama ang plano ni Mayor Tomas Osmeña kay pinaagi niini makadaginot og kuwarta ang siyudad. Apan kinahanglan usab unta nga hingusgan sa kagamhanan sa dakbayan ang pagpahamtang og silot niadtong mga tawo nga wala motuman sa lagda nga gilatid sa Ecological Solid Waste Management Act.

Ang maong balaod naglatid nga kinahanglan nga ang mga molabay og basura, gibuwag-buwag na daan ang mga madugta ug ang dili malata.