First communicants

Pormal na nga buksan karong adlawa ang mga kalihokan sa International Eucharistic Congress dinhi sa Sugbo. Alas 4:00 karong hapon, usa ka Santos nga Misa ang ipahigayon sa Plaza Independencia nga pangulohan sa Papal Legate nga si His Eminence Charles Maung Cardinal Bo, SDB, DD sa Myanmar. Siya ang personal nga gipili ni Pope Francis nga morepresentar kaniya alang sa mga kalihokan sa IEC dinhi sa Sugbo.

Gipaabot ang kaliboan ka mga katoliko, malangyaw man o lokal nga mga delegado sa IEC ang motambong sa Santos nga Misa. Bukas usab kini bisan sa dili mga delegado nga gustong mosimba ug mosaksi sa pagbukas sa kalihukan sa IEC.

Nakaplastada na ang tibuok semana nga mga relihiyosong kalihukan. Usa sa mga highlight mao ang Santos nga Misa alang sa gibana-banang lima ka libo ka batan-on, ug dili na kaayo batan-on, nga modawat sa ilang labing unang communion kon pagpangalawat. Ipahigayon kini unya sa Sabado, Enero 30, anha sa Cebu City Sports Center.

Makahuloganon kining maong kalihukan tungod kay ang mangulo sa kasaulogan mao si Cebu Archbishop Emeritus Ricardo Cardinal Vidal nga usa sa mga first communicant sa labing unang pagpahigayon sa IEC dinhi sa nasud niadtong 1937. Si Cardinal Vidal niadtong higayona nag-edad pa og sais-anyos, ug paglabay sa 79 ka tuig, karong tuiga ang kanhi sais-anyos nga first communicant sa labing unang IEC dinhi sa nasud, karon usa na ka Cardinal ug mao na usa’y mopakalawat ngadto sa lima ka libo ka first communicant sa ikaduhang pagpahigayon sa IEC dinhi sa Pilipinas. Karong tuiga mag-85 anyos na si Cardinal Vidal, unya sa Pebrero 6.

Halos walo ka dekada ang nilabay una pa nahibalik sa Pilipinas ang pag-host sa IEC. Busa dako kini nga okasyon ug pribilihiyo alang sa mga Katoliko ug sa mga Kristiyano nga dunay bukas nga panghuna-huna sa pagpalambo sa tagsa-tagsa ka espirtihanong pagtoo.

Usa sa nipahimug-at niining maong kalihukan mao ang paghatag og bili sa Simbahang Katoliko sa 500 ka bata ug batan-ong kabus nga makakalawat sa labing unang higayon.

Sama sa 19-anyos nga si Jonathan Vergel. Sa niaging semana lang siya nabunyagan. Maong iyang gikalipay ug naghinam-hinam na nga makakalawat sa labing unang higayon sa iyang kinabuhi. Ang otso-anyos nga si Paul Carlo Flores nga gibiyaan sa iyang mga ginikanan nangandoy usab nga magpari. Siguro ang maong damgo matinuod karong makasinati na siya sa pagdawat sa lawas ug dugo ni Kristo.