Unsay matabang sa IEC
Sayon rang istoryahon nga aron di mahasol sa pagtak-op sa daghan ug dagkong kadalanan nga gamiton sa mga delegado sa International Eucharistic Congress (IEC) di lang una ta manggawas sa atong mga pinuy-anan. O kun may mga tuyo man gyud sa maapektahan nga kadalanan, mas mosayo pag-adto aron nga di matanggong sa pagtak-op na sa kadalanan.
Mas maglisod ang mga trabahante ug mga tinun-an kansang mga trabahoan ug mga eskuylahan nahimutang duol sa venues sa IEC. Busa sa gusto nila o dili, kinahanglan nilang atubangon ang mas hinigpitan nilang kalihokan sa matag adlaw sa IEC. Kabahin sila sa mga kinahanglan nga mohimo sa labing dakong sakripisyo alang sa IEC.
* * *
Mga pasahero sa barko gikan ug padung sa Sugbo ug kasilinganang mga lalawigan apil sa maigo sa pagsira sa kadalanan sa palibot sa Plaza Independencia nga maoy pahigayonan sa Santos nga Misa pagbukas sa IEC karong Domingo, Enero 24. Kay di na man paagian og mga sakyanan ang Legaspi Extension, nga maoy kinadul-an nilang agianan gikan ug padung sa Pier 1, mapugos sila sa pagbaktas nga magbaswat ug maglukdo sa dagko ug bug-at nilang mga bagahe. Mahimong mosayo ang mga manakay og barko sa gabii. Apan way kapilian ang mga pasahero sa mga barkong modunggo sa Pier 1 samtang nagpadayon pang misa sa IEC.
* * *
Giawhag ang mga motorista sa pagpangita nang daan og alternatibong mga agianan. Samtang ipatuman sa Cebu City Transportation Office (CCTO) ang rerouting alang sa PUJs nga maapektahan sa pagtak-op sa St. John Paul II Avenue (kanhi Juan Luna, kanhi San Jose dela Montana) ug uban nilang naandan nga agianan.Nitambag sang mga suhito nga dako og ikatabang ang Waze application sa mobile phones. Kay kun mas daghan pa gyung mogamit, mas tukma ang kasayuran asang kadalanan nga nabara ug asa ang luag. May nisugyot sab sa higanteng mga kompaniya sa telekomunikasyon paglibre sa Waze, sama sa ilang paglibre sa Facebook, bisan atol lang sa semana sa IEC.
* * *
Laing dako og sakripisyo mao ang kahugpongan sa trucking companies. Nisugot sila sa pinalapdan nga truck ban di lang sa venues sa IEC kun dili hasta na sa kadalanan sa hotels ug ubang mga pinuy-anan sa lokal ug langyaw nga mga delegado.
Way makalalis sa kamakasaysayanon ug kamahuloganon sa IEC kansang pasiunang mga sesyon nagsugod na gahapon. Ang kataposang IEC sa Pilipinas gipahigayon sa kaulohan niadto pang 1937. Wa pay nahibawo kanus-ang sunod. Ang atong paghangop sa mga delegado, pagtampo bisan unsa kagamay aron hapsay ang tanan nilang kalihokan ug pagtabang paghimong mas luwas sa ilang pagpuyo dinhi makapalambo sa turismo ug labaw sa tanan makapalig-on sa atong kadungganan pagka duyan sa Kristiyanismo sa tibuok Asya.
* * *
- Latest
