Mahalon nga China-made

Tulo ka adlaw nga gituyoktuyok ni Mar Roxas ang Sugbo sa miaging semana. Makatabang kaayo kini og dako nga ikompirmar nga ang Sugbo pabiling magsuporta kaniya, sama sa pagsuporta kaniya sa miaging mga eleksiyon.

Ang pagbinugtong ni Roxas sa presidential debate sa University of San Jose-Recoletos dakong puntos alang kaniya kay siya lang ang nakapanubag daw eksperto sa mga isyu nga giatubang sa nasud.

Wala motunga silang Grace Poe, Jejomar Binay, ug Miriam Defensor-Santiago bisan sa imbitasyon sa tunghaan.

Sa University of the Visayas, si Roxas ang gipaila ni Eddie Gullas ngadto sa mga estudyante nga “next president of the Republic of the Philippines.’

Ang mga ‘millennials’ ilabi na kining mga nagtungha sa mga unibersidad maka-impluwensiya sa ilang mga ginikanan kinsay ilang botaran sa eleksyon karong 2016.

Apil sa giduaw ni Roxas ang Boljoon. Sa iyang pagpamista, iyang gikahinabi ang iyang mga alyado sa Sugbo.

Tungod niini, naprobahan ba kaha nga sayop ang pangangkon ni Binay nga “Binay country”  kuno ang Sugbo?

* * *

Angayang molusad og imbestigasyon si Gobernador Hilario Davide III ning anomalosong pag-award sa P250.6 milyones nga kontrata pagsuplay og heavy equipment ngadto sa ‘highest bidder.’

Angay susihon ni Davide ngano nga ang kinamahalan nga mga boom trucks, hydraulic excavator, payloader ug forklift, mga ginama pa sa China, ikomparar sa barato apan ginama sa Japan.

Sa tulo ka bidder, ang Conequip misumiter og kinatas-an nga bid price nga P250.6 milyones alang sa China-made nga 15 ka heavy equipment, ikomparar sa mga Japan-made sa RDAK nga P235.05 milyones ra ug Civic Merchandising nga P237.17 milyiones ra.

Aron masuta kun tinuod ba ang pangangkon sa tsirman sa Bids and Awards Committee nga si Atty. Mark Tolentino nga wala makapasar sa ‘specifications’ ang mga heavy equipment sa RDAK ug Civic, ang makatubag niini mao ra gyud ang subsob nga pakisusi. Ug sa kasamtangan, ikanselar una ang pag-award.

Kanang specification basta maghisgot og produkto gikan sa China tikas gyud na, sa ato pa, dili katuohan. Kun produkto gikan sa Japan o US o ubang kasaligang nasud, ang ilang specification tukma gyud na kaayo.

Moingon gani ka og gikan sa China, dili gyud na kalidad tukma sa presyo nga imong bayran.

Samtang ang kadaghanan naglikay nga makapalit og mga gagmay’ng butang gikan sa China kay dali kining mangaguba, ang Kapitolyo dali kaayong naka-award unya ang ilang paliton dili dagom o bombilya gikan sa China, kun dili mga heavy equipment gyud.

Kun mangaguba kini, ipatimbang na lang? Bisan moingon og walay binuang kay walay nakakuwarta, ang pagpabor sa mahalon ug China-made nga heavy equipment binuang kaayo nang dako.