Sinabtanay lang!

Usa sa gitamdan sa mga television journalist mao ang "No Video, No Story" policy. Bisan unsa ka nindot nga estorya kun wala’y video, wala kini silbe.

Kini ang hinungdan nga magkarakara gyud ang TV reporter uban ang cameraman pag-adto sa dapit diin nahitabo ang balita bisan pa sa kalayo ug sa kalisod sa agianan, ilabi na kun dako kaayo ang panghitabo.

Niadtong niaging semana, adunay nahitabo nga engkwentro tali sa gituohang grupo sa mga tulisan ug kapolisan sa lungsod sa Catmon diin tulo ang nakalas, apil na ang usa ka polis ug duha ka suspek.

Uban ang akong cameraman among giadto ang nahitaboan sa pinusilay aron makuha gyud ang tukma nga impormasyon.

Tungod kay didto man ang hepe sa Catmon Police Station nga si Senior Inspector Roberto Hugo naglakaw-lakaw sulod ug gawas sa presento, ako siyang gihangyo nga interbyuhon, bisan og kadiyot lang.

Gipahuwat ko niya kay busy pa kuno siya mao nga nisabot lang usab ko. Alas 8:30 pa sa buntag ako naghulat sa opisyal nga magpa-interview apan naabtan na lang ko og alas onse sa udto wala gyud kini moatubang kanako.

Bisan na man lang unta sa pagbalibad nga dili siya puwede magpa-interview tungod kay duna siya’y personal nga rason. Isip responsable nga journalist dili man kita mamugos pag-interview kun motarong lang sa pagbalidad, dili kay palaumon kita ug pahulaton og dugay.

Hinoon, nagpasalamat ko sa ilang imbestigador nga si PO3 Ben Navales nga maayo nga miabiabi kanamo ug mihatag sa mga inpormasyon nga among gikinahanglan.

Ang mga tigbalita andam mosabot sa mga news sources kun tarungon lang. Kinahanglan usab masabtan sa mga news sources ang responsibilidad sa mga tigbalita nga adunay deadline nga giapas ilabi na nga layo kaayo ang dapit nga nahitaboan sa krimen.

Hinoon diha nga mopauli na mi, diha pa migawas ang opisyal kinsa nangayo og despensa tungod kay matud niya busy kaayo siya apan wala gihapon nagpa-interview. Pagkatoytoy!