Kunsintidor si Abaya
INUTUSAN ni President Aquino si Department of Transportation and Communications (DOTC) Secretary Abaya na siyasatin ang tanim-bala raket na umiiral sa Ninoy Aquino International Airport.
Nagdesisyon si Aquino na magpaimbestiga nang grabe na ang nangyaring kasiraan at hanggang sa ibang bansa ay nakarating na ang kahihiyang ito ng ating gobyerno.
Bakit ba laging huli kung magdesisyon si Aquino. Ang kanyang desisyon sa pamamahala ay katulad ng kanyang desisyon sa kanyang love life, always late.
Ito namang kanyang alipores na si Abaya ay kilalang-kilala sa pagiging kunsintidor. Kaya asahan natin na maaabsuwelto ang kanyang mga tauhan. Itaga ninyo sa bato ang aking sinabi. Tiyak na magkakatotoo.
Hindi nga ba sa isinagawang imbestigasyon sa MRT 3 maintenance contract deal ay inabsuwelto ni Abaya ang kanyang mga tauhan?
Ayaw niya silang pakasuhan. Bakit kaya? Dahil ba sa mayroon din silang alam na sekreto ni Abaya na hindi lamang nakahihiya kundi maari niyang ikasira pag nabulgar? Katulad ng mga eskandalosong kontrata sa mga palpak na tren?
Mabuti na lamang at binutata ng Ombudsman si Abaya kaya nakasuhan ang kanyang mga tauhang liku-likong daan ang tinalunton. Isa na namang kahihiyan sa administrasyong Aquino.
Kung nais ni Aquino na malaman ang nakahihiyang katotohanan sa tanim-bala raket, dapat hindi ang DOTC ang inutusan niyang nagsiyasat.
Dapat ay isang independent body ang nag-imbestiga para lumitaw ang buong katotohanan. O baka naman talagang sinadya ni Aquino na si Abaya ang magsiyasat para mapagtakpan ang kanilang kapalpakan.
Paano ko natiyak na walang patutunguhan ang gagawing pagsisiyasat ni Abaya? Simple lang po. Itong si Abaya ay manang-mana kay Aquino sa pagiging kunsintindor, kaya never na uusigin niya ang kanyang mga tauhan.
Incompetent na, makakapal pa ang mukha. Garapalang sinabi ni MIAA general manager Jose Angel Honrado na hindi siya magre-resign maliban na lamang kung ipag-utos ng kanyang panginoon.
Wala talagang kahihiyan. Kaya wala tayong aasahang matinong pamamahala mula sa student government ng isang presidenteng walang karapatang mamuno.
- Latest
