Kalbaryo sa haze

Mitin-aw na  kuno ang kawanangan dinhi sa Sugbo human sa pipila ka adlaw nga pagdagsang sa haze mugna sa mga forest fires nga pipila na ka bulan nga nagdilaab didto sa kalasangan sa Sumatra sa Indonesia. 

Apan bisan pa man niini, magpabilin gihapon ang maong haze dinhi. Matud pa sa Environmental Management Bureau-7 sa Department of Environment and Natural Resources, nagkahanaw man tuod ang haze, apan magpabilin kini ibabaw sa Sugbo ug uban pang mga lugar sa rehiyon.

Hinuon sukwahi kini sa pamahayag sa Philippine Atmospheric, Geophysical and Astronomical Services Administration. Matud sa state weather bureau nga libre na kuno ang nasud gikan sa haze basi kuno sa satellite data.

Apan dili angay nga mokumpiyansa ang publiko. Bisan pa man niining maong kalamboan, dakong posible nga mobalik ang baga nga haze. Gani matud pa sa EMB-7, dili pa safe ang hangin sa Metro Cebu.

Mao nang giawhag sa mga health authorities ang publiko, ilabina niadtong adunay asthma ug ubang sakit sa baga, sa paggamit og mask sa ilang paglakaw sa gawas. Kini aron paglikay sa grabe nga epekto sa haze.

Sa pagkakaron, walay mahimo ang kagamhanan sa Pilipinas niining pagkuyanap sa haze gikan sa Indonesia. Dili usab mahimong kasohan sa Pilipinas ang Indonesia tungod sa kapakyas niini pagpugong sa mga forest fires didto sa Sumatra.

Hinuon dili lamang Pilipinas ang girumbo karon niining haze. Ang Singapore ug Malaysia hagbay ra’ng mireklamo niini. Gani dako na kini’g epekto sa turismo sa maong mga nasud tungod sa mitibugsok nga kalidad sa ilang hangin.

Ang mahimo lamang sa atong kagamhanan mao ang pag-awhag usab sa kagamhanan sa Indonesia paggukod niadtong walay habas ang mikaingin sa kalasangan didto. Kini aron mahunong na kining haze nga hagbay rang nahimong kalbaryo sa kasilinganan niining mga nasud.

Kay kun padayon kining maong haze nga mo-pollute sa atong kahanginan, dili tiaw unya ka grabe ang epekto niini. Gawas nga molihay ang mga turista pagbisita sa Pilipinas, moresulta usab kini sa dakong kadaut sa atong panglawas.