Padayong paghilo sa publiko
Ilubong na karong hapon ang patay’ng lawas sa 6 anyos nga si Kent Fuego Albor nga nakalas sa dengue sa bukirang bahin sa Consolacion, amihanang Sugbo. Naibanan hinuon og diyutay ang pagbangotan sa iyang mga ginikanan, kaparyentihan ug kahigalaan kay nakagawas na sa ospital nga luwas sa dengue ang iyang maguwang nga si Alterra Jane, 8.
Wa pa matino diin mapaaki ang managsuon og lamok nga nagda sa makamatay nga sakit. Nakaplagan sa health inspectors nga pulos positibo sa presensiya sa mga lamok nga may dengue ang palibot sa ilang pinuy-anan sa Bato, Casili, Consolacion ug ang palibot sa ilang eskuylahan sa Casili, Mandaue City.
* * *
Giawhag sa mga kawani sa municipal health office sa Consolacion ang mga molupyo sa Bato, Casili sa pagpanlimpiyo sa ilang palibot, pagyabo sa tanang balde, planggana ug ubang sudlanan sa tubig ug pagpadagan sa tubig sa ilang mga kanal. Ang mga ginikanan nilang Kent ug Alterra naneguro sab nga mabasiyo sa bisan unsang nagpundo nga tubig ang ilang sandayong.
Sa pikas nga bahin, naabtan namo ang mga magtutudlo sa ilang eskuylahan, ang Mandaue City School for the Arts, nga nagpasiugda og mist spraying sa tanang classrooms sa elementarya ug high school. Nipasabot ang kadagkoan sa eskuylahan nga tungod sa nahitabo nilang Kent ug Alterra di na paigo ang pagpanlimpiyo lang sa palibot.
* * *
Wa pay seguro kun naabtan ba sa gipasirit nilang mga kemikal ang mamumuo nga mga lamok. Nga napamatud-an sa daghan na uyamot nga mga pagtuon nga mas abtik nga makalupad ug makabalhin kay sa mga nagpasiugda sa mist spraying ug fogging. Seguro hinuon nga makadaot sa mga tinun-an ug mga magtutudlo kun masingo nila ang makahilong mga kemikal.
Gipasaligan ang mga magtutudlo nga environment-friendly ang mga kemikal nga ilang nakuha gikan sa Department of Health (DOH). Tinuod gyod tingali nga luwas ang mga kemikal kay gisuspenso man ang tanang klase sa tanang ang-ang sa eskuylahan.
* * *
Unsay kahigayonan nga motugdon ang mga lamok sa mga bungbong ug mga pultahan sa classrooms ug mga punoan sa kahoy nga gipasiritan sa mga kemikal? Kun basehan ang nangaging mist spraying ug fogging operations nga napakyas pagpuo sa mga lamok nga may dengue, gamay ra. Mas dako ang kahigayonan nga ang gagmay’ng mga bata di maato pagbadlong sa mga magtutudlo maoy makahikap ug makatilap sa makadaot nga mga kemikal.
Bisan sa kadaghan nang pagbalikbalik sa mga eksperto nga ang pagpanlimpiyo maoy labing epektibong panagang sa dengue ug nga ang mga kemikal mas makadaot sa mga tawo kay sa mga lamok, nganong ang lokal ug nasudnong mga ahensiya sa gobiyerno magsige man gihapon og palaban sa mga kemikal? Nakatag-an ka, way komisyon sa pagpanlimpiyo sa palibot.
- Latest
