Mga kandidato nagpanikad na

Mahibaw-an na karong sunod semana ang mga kandidato sa lainlaing partido ug makasugod na ang katawhan paghashas kanila kun kinsa ang angay’ng tugyanan nato sa pagdumala sa renda sa kagamhanan.

Dinhi sa dakbayan sa Sugbo, “finishing touches” na lang ang gipaabot sa Team Rama ug Bando Osmeña Pundok-Kauswagan (BOPK) aron makompleto ang ilang political line-up.

Sa han-ay sa mga kandidato sa masi’g ka partido dinhi sa dakbayan sa Sugbo, sigurado ko nga wala’y grupo nga makaangkon og “8-8,” nga sa ato pa modaog ang tanan nilang konsehal.

Duna may mga konsehal nga alyado sa BOPK ug Team Rama nga matan-aw nimo nga sigurado g’yud nga modaog. Kanila ni Mayor Michael Rama ug ni kanhi Mayor Tomas Osmeña, pareho sila nga mga lig-on.

Angay g’yud nga wala’y usa kanila nga magpaluya-luya atol sa kampanya.

* * *

Sa Mandaue, dili kaayo nako kabisado ang mga konsehal. Apan si Konsehal Lolypop Ouano-Dizon puwerte’ng kusoga kay mura’g wala’y kakapoy nga mosuroy sa kabarangayan.

Ang nakanindot ni Lolypop kay wala’y isyu nga siya nangilkil og kuwarta sa katawhan. Iyang ikakontra kuno, ambot kun madayon ba, mao si Kongresista Luigi Quisumbing.

Mura’g sa umaabot nga eleksyon, magkapuliki g’yud og panubag si Quisumbing sa isyu nga may labot sa iyang PDAF nga giingong gibutang sa usa ka “bogus” nga kahugpongan base sa report sa Commission on Audit.

Kun tuparon silang duha si Luigi ug Lolypop, sigurado ko nga ang katawhan adto g’yud ni Lolypop mobotar. Nakapabor si Lolypop kay lumad g’yud siya nga taga Mandaue ug apo ni kanhi Mayor Pedong Ouano.

* * *

Sa Talisay, mura’g tulo ang magsangka sa pagka mayor ug usa na sa magpapili mao ang tadhan na nga si kanhi kongresista Eddie Gullas. Gipilde ra ba ni Mayor Johny V. Delos Reyes si Edigul sa eleksyon niadtong 2013 mao nga kinahanglang dili na mokumpiyansa karon si Edigul.

Si Vice Mayor Romeo Villarante magpapili ‘sab kuno pagka mayor ug adto siya mopasilong sa kampo ni Senador Grace Poe. Sa ato pa, si JVR ug Edigul pareho nga mopasilong sa Liberal.

Sa Lapu-Lapu, nindot ang balita nga mihunong na si kanhi kongresista Arturo Radaza sa iyang tinguha nga atbangan ang iyang asawa nga si Mayor Paz Radaza.

Ambot kaha diha sa Toledo ug Danao kay wala pa ko’y inpormasyon kun kumusta na ang politika sa ilang lugar.