EDITORYAL - Seguridad sa panimalay

Gipatay sud mismo sa ilang balay ang 17 anyos nga tinun-an sa University of San Carlos sayo niining semanaha, nagpakita kini nga bisan sa atong mga panimalay dili garantiya ang kaluwasan.

Matud pa sa imbestigasyon sa kapolisan sa Lapu-Lapu City, nakaila ang biktima sa mga mamumuno mao nga nakasulod sila ug nabuhat ang krimen ngadto sa wala intawoy bawot nga dalagita dihang gituok kini hangtud nga namatay. Samotan pa gyud nga lugak kaayo ang seguridad sa subdivision nga unta nagsuhol man sila og mga guwardiya aron mosiguro sa ilang kaluwasan isip maoy nagpasweldo kanila.

Kini nga insidente nahitabo usab sa miaging buwan sa lungsod sa Minglanilla diin ang manag-inahan gipatay ug gisuwayan pa og tago sa mga kriminal ang krimen pinaagi sa paglubong kanila sa septic tank sa balay. Ang panimalay sa manag-inahan nahimutang usab sa usa ka subdivision sa maong lungsod. Kun itandi ang mga subdivisions sa kasagarang residential areas , layo kaayo og deperensya kun kriminalidad lang ang hisgutan.

Tungod sa maong mga ngil-ad nga hitabo, daw nakamata karon ang nagkadaiyang homeowners sa mga subdivisions nga diin sagad namuyo ang makonsiderar nga 'tubig-tubigan.'

Ang mga homeowners sa maong duha ka mga subdivisions nipahugot na karon sa ilang mga seguridad, butang nga kaniadto pa unta nila gibuhat sa wala pa ang maong mga krimen. Ang atong kapolisan kanunay nagpahinumdom nga ang seguridad ug kaluwasan sa matag usa responsibilidad sa matag indibidwal kay dili sa tanang panahon anaa sila sa duol.

Nagpasabot kini nga dili bati kun maghinobra ang pagka-security conscious sa tawo kay iya mang katungod ang mabuhi.

Ang simpleng pagsunod sa mga personal security measures sa sud ug gawas sa panimalay wa magkinahanglan og dakong gasto, disiplina lamang sa kaugalingon aron ang tanang miyembro sa pamilya, trabahoan ug katilingban luwas sa tanang panahon.