Nag-abot dinhi sa Sugbo sugod niadtong Domingo ug Lunes ang mga nasudnong politiko nga nipadayag na sa pagpapili ug niadtong mga nagpaduda pa sa ilang intensyon nga magpapili sa election sunod tuig.
Una nga niabot si Bise-Presidente Jejomar Binay nga nisuroy sa nagkalainlaing dapit sa Sugbo aron mahimamat ang mga ordinaryo'ng Sugbuanon.
Usa sa mga gikahimamat ni Binay sa Barangay Mambaling, Cebu City mao ang 66-anyos nga si Fernando Abanes. Wala damha ni Manoy Fernando nga iyang ikahimamat si VP Binay.
Naglakaw lang si Noy Fernando daplin sa karsada nga naghukas tungod kay mopalit siya og tuktokon sa manok diha nga may sakyanan nga nihunong sa iyang tungod.
Sa wala niya paabota nga higayon, si VP Binay ang nanaog ug nitunol kaniya og t-shirt nga may hulagway sa bise-presidente.
Matud ni Noy Fernando nga sa iyang pagkakita sa bise-presidente nakahinumdom siya sa iyang amahan nga pupareho g’yud og bayhon ni Binay.
Ang maong panagtagbo giasoy ni Noy Fernando ngadto sa iyang mga anak ug mga silingan.
Gawas ni Noy Fernando, nakig-boodle fight pa si Binay sa mga molupyo sa Barangay Gen. Climaco sa dakbayan sa Toledo, kasadpang Sugbo.
Samtang didto sa Toledo City si Binay niadtong Lunes, sa dakbayan sa Sugbo usab nanubag ug nakig-atubang sa nagkalainlaing sektor sila si DILG Secretary Mar Roxas ug ubang cabinet members sa gipahigayon nga people's dialogue.
Nakighimamat usab sila sa dul-an walo ka libo ka sakop sa Liberal Party sa Kabisay-an sa ilang gitawag nga "gathering of friends" didto sa Cebu Coliseum.
Si Senador Grace Poe, sa iyang bahin bisan kun wala pa hingpit nga nipahibawo sa iyang posible nga pagdagan pagka-presidente, nakig-atubang usab sa mga tinun-an atol sa pagbukas sa kalihukan sa “university days” sa University of San Carlos.
Bisan kun wala’y gikatakdang pakigpulong, namulong si Poe atubangan sa mga tinun-an ug nipahimug-at sa pagpalig-on sa kalidad sa edukasyon. Bisan kun dili sila moangkon, klaro na nga ang ilang gihimo usa na ka pangampanya.
Makalusot pa sa pagpangulipas kining tulo ka personalidad nga posible’ng modagan pagka-presidente tungod kay pulos pa sila incumbent.
Bisan og miluwat na sa katungdanan si Roxas human siya gituboy ni Presidente Aquino nga standard bearer sa Liberal Party, apan nagpabilin pa siya sa puwesto kay wala pa dawata ni PNoy ang iyang resignasyon.
Kini maoy nakabentaha sa mga politiko nga anaa sa puwesto. Makagamit gihapon sila sa mga makinarya sa gobiyerno sa ilang pagpangampanya.
Mao ni ang giingon "hitting two birds in one stone." Himoon nga rason ang official business sa ilang pagpangampanya.