Ilegal suwertres operation

Angay na g’yud tingali nga mulihok ang kapolisan kay atong nasayran nga may nag-operate man diay nga “ilegal suwertres” dinhi sa dakbayan.

Gitug-anan ko sa akong higala nga akong gikasakay sa eroplano nga gikan sa Davao City sa operasyon niini’ng mao nga sindikato. Gitawag kuno kini og Operation Mercury.

Ang report nga miabot kanako nagbutyag nga bansagon og “L” ang tawo nga nag-operate niini’ng mao nga mga ilegal suwertres nga may kapin sa 180 ka booking outlets sa lainlaing dapit dinhi sa dakbayan.

Nakahinumdom dayon ko sa gisulti sa akong usa ka tigpaniid nga nakabantay siya og suwertres outlet diha duol ra g’yud sa Pahina San Nicolas barangay hall.

Unya, nahinumdom usab ko nga dunay susama nga suwertres outlet nga gisigehan og reklamo sa usa ka radio announcer sa DYLA diha sa Barangay San Roque.

Ang akong informer mitug-an nga giproteksiyonan diay sa mga polis kini’ng mao nga ilegal suwertres operation dinhi sa dakbayan mao nga wala gayud kini maronda.

Porbida! Awhagon nako ang kadagkoan sa Police Regional Office-7 nga maoy mohimo’g aksiyon niini kay, kun tinuod ang report nga miabot kanako, dili makahimo’g aksiyon ang mga polis dinhi sa dakbayan.

Aw, kay si Senior Superintendent Marciano Batiancila na man maoy acting police director sa dakbayan sa Sugbo, hagiton nato siya nga himoan niya kini og aksiyon.

Sigurado ko nga wala malilong kang Sir Batiancila kini nga isyu kay karaan siya nga polis dinhi sa dakbayan. Awhagon usab nato si PRO-7 director Prudencio Tom Bañas nga iparonda niya dayon kini nga mga ilegal nga sugalan.