Lalis sa DENR ug Deca

Nitingog nang developer sa subdivision project nga gipasanginlang namutol sa mga punoan sa kahoy sa bukirang barangay sa Kalunasan sa Dakbayan sa Sugbo nga way pagtugot gikan sa Department of Environment and Natural Resources (DENR). Niinsistir ang 8990 Housing Development Corporation, nga maoy nagtukod sa Deca Homes ug Villa Leyson, nga gisubay nila ang proseso ug gituman ang tanang panginahanglan sa wa pa putla ang mga punoan sa kahoy sa labing uwahi nilang proyekto sa Sitio Laya sa Kalunasan.

Pagmatuod sa ilang pangangkon, ang ilang mga representante dinhi sa Sugbo nipakita og mga dokumento sa among kaubanan sa Tubag! sa ABS-CBN Channel 3 ug sa DYAB Abante Pa, Bisaya!

* * *

Apil sa ilang gipakita namo mao ang mosunod nga mga dokumento:

Suwat sa Cebu City Environment and Natural Resources Office (CENRO) pinaagi ni Officer-in-Charge Raul Pasoc niadtong Nobiyembre 4, 2014 nga nitataw nga wa siya’y pagsupak sa suwat-pananghid sa developer niadtong Oktubre 3, 2014 pagpamutol sa mga kahoy; ug

Ang Certificate of Tree Plantation Ownership (CTPO) nga gipirmahan ni DENR 7 Regional Director Isabelo Montejo niadtong Enero 13, 2015.

Gitataw ni Atty. Anthony Vincent S. Sotto, General Manager sa 8990 Holdings Inc., nga ang suwat ni Pasoc ug ang CTPO ni Montejo maoy mga ebidensiya nga legal ang ilang pagpamutol sa mga kahoy.

* * *

Apan dihang gipakighinabian ni Aiza Layague sa TV Patrol Central Visayas, si Montejo nitataw nga way pagtugot gikan sa DENR ang pagpamutol sa 151 ka punoan sa kahoy sa Kalunasan. Nipasabot si Montejo nga ang CTPO nga iyang gipirmahan igo lang nagmatuod nga pribado ang pagpanag-iya sa luna nga gitamnan sa mga kahoy apan wa magtugot sa developer pagpamutol na sa mga kahoy.

Matod ni Montejo kinahanglan pang mokuha ang developer og buwag nga tree cutting permit una makapamutol sa mga punoan sa kahoy. Sukwahi ni sa baruganan ni Sotto nga kay gipamatud-an na man sa DENR nga sila ang tag-iya sa luna mahimo nang putlon ang mga kahoy.

* * *

Nganong wa man sila magkasinabtanay? Napakyas ba lang ang DENR sa pagpasabot sa ilang mga lagda? Si Dr. Ed Llamedo, tigpamaba sa DENR 7, maoy nitawag sa among atensiyon sa ikaupat nga kundisyon sa Environment Compliance Certificate (ECC) nga giluwatan sa Environmental Management Bureau (EMB) alang sa proyekto:

Gidid-an ang developer sa pagpamutol og mga kahoy; kun kinahanglan man gyong mamutol, angay’ng mananghid una sa buhatan ni DENR Secretary Ramon Jesus P. Paje. Matod ni Montejo wa mananghid sa iyang buhatan, labaw nang Paje, ang 8990 Holdings. Hinaot nga maklaro na unsay silot nga ikapahamtang, kun may kalapasan man gyong nahimo, atol sa panagtagbo nilang Montejo ug Sotto ug ubang kadagkoan sa DENR ug 8990 karong Lunes.   [email protected]