EDITORYAL - Papel sa US vs terorismo

Pila na ba ka malampusong mga operasyon ang nahimo sa kapolisan ug sa militar batok sa mga teroristang grupo dinhi sa nasud?

Ang uban niini nahimo tungod sa tabang teknikal ug teknolohiya sa Amerika tungod kay ang 'global war on terror' nahimo na nila karong polisiya human sa 911 terror attack didto sa ilang nasud.

Samtang tinuod ang US ra maoy subsob kaayo nga nangugi sa kampanya kontra terorismo, apan walay nasud sa kalibotan ang gusto nga dunay mga terorista sa ilang mga lugar.

Sama sa Pilipinas, nag-atubang kini og dakong problema sa Abu Sayyaf, Rajah Sulaiman Movement (RSM), BIFF ug uban nga nasudlan na sa Jemaah Islamiyah. Angay bang pasalamatan ang pagtabang sa US sa Pilipinas? Angayan lang. Kay pinaagi sa ilang mga modernong gamit nga wala sa Armed Forces of the Philippines ug sa Philippine National Police daghang kinabuhi ang nasalbar.

Apan ning bag-ohay lang, gikwestyon ang partisipasyon sa mga Amerkano sa nahitabo sa Mamasapano, Maguindanao niadtong Enero 25 diin 44 ka sakop sa PNP-Special Action Force ang namatay.

Kalapasan ba diay kun mohatag sila og technical assistance sa lokal police aron pangitaon ug i-neutralize ang usa ka international terrorist sama ni Zulkifli bin Hir alyas Marwan?

Naesplikar na ngadto sa mga senador pinaagi sa closed -door conference uban sa resource persons (AFP ug PNP) sa nagpadayon inquiry, ang papel sa mga Amerkano ug natagbaw sila sa eksplinasyon.

Nganong gusto pa man g'yud sa uban nga ipublikar kini? Nakasabot ba kaha ni sila nga naglambigit kini sa national security? 

Ang labing maayong buhaton , paabuton kun unsay resulta sa imbestigasyon aron silotan kinsay sad-an ug dili na mag-apil apil sa mga hilisgutanan nga wala silay labot aron di mosamot ang problema.