Kuyaw na karon

Ang mga polis nga kusog manakop sa mga badlongon, ingon man mga sakop sa media nga puwerte’ng moatake sa mga salawayon, angay g’yud nga dili na mokompiyansa ug magbantay kanunay.

Tiaw mo, polis nga si SPO4 Rasul Segismar gibanhigan samtang paingon na sa ilang balay sa Minglanilla. Unya, ang magsisibya nga si Maurito Lim gipusil ‘sab paghunong sa iyang sakyanan duol sa estasyon sa radyo nga adto unta siya magsibya niadto’ng Sabado didto sa Bohol.

Kun imong hinuktokan pag-ayo, si SPO4 Segismar adunay armas apan napatay gihapon siya. Dako g’yud ang posibilidad nga kompiyansa ra kaayo siya mao nga diha’ng miatake ang kriminal wala siya makapanalipod sa kaugalingon.

Ingon usab niini ang nahitabo ni Engr. Lim nga giduol sa kriminal ug gipusil. Ang uban moingon nga wala gihapo’y kapuslanan kun aduna kay armas kay dili ka man masayod kanus-a moatake ang mga kriminal.

Apan alang kanako, mas bentaha na lang g’yud unta nga adunay armas. Ako lang kun duna pa ko’y kuwarta, gusto ko nga makabaton og nindot nga armas. Tan-awa ang sitwasyon ni magsisibya Choy Torralba. Gipusil siya sulod sa iyang sakyanan ug naigo apan diha nga mibawos siya’g pusil, midagan ang gunman.

Kun wala pa siya maka-return fire sa iyang armas tiwasan g’yud si Choy niadto’ng gunman nga matud niya miduol na unta sa iyang sakyanan.

Ang photographer sa Freeman nga si Allan Dizon, samdan na diha’ng gipusil ni Dodong Belandres didto duol sa SM City. Milingkod na lang sa gutter si Allan ug misiyagit og tabang diha nga giduol ni Belandres ug gitiwasan.

Kun may armas pa si Allan ug nagbansay pagpunting, tingali wala pa siya isulod sa nitso. Si Senior Superintendent Paul Labra II gibanhigan apan diha nga mibawos pagpabuto nanagan ang mga namusil kaniya. Buhi pa’s Labra.