PROBE Gising!

Mipasalig ang hepe sa Prevention Restoration Order Beautification Enhancement (PROBE) nga gub-on niya ang mga ilegal nga straktura nga gitukod daplin sa access road diha sa Barangay Kamagayan.

Gitug-anan ko ni  Raquel Arce nga ang mga opisyal sa barangay maoy naghatag og pagtugot nga ang mao nga mga tawo makatukod og tindahan daplin sa karsada nga access road gikan sa P. del Rosario paingon sa Junquera Street.

Apan bisan pa og may “bendisyon” pa sa mga opisyal sa barangay ang mao nga mga ilegal nga straktura nga gitukod daplin sa karsada, ug nakapagamay sa karsada, may katungod gihapon ang mga sakop sa PROBE nga kini panggub-on.

Ang ako lang nga wala magustohi mao nga sila sa PROBE dugay na diay nga nakakita niini’ng mao nga binuang nga pagtukod og tindahan nga nakapasamot kagamay sa karsada apan ila ra nga gipasagdan.

Giingnan ko ni Ma’am Raquel Arce nga ang akong lindog sa Banat News kaniadto’ng miagi’ng Domingo, maoy gamiton nila nga basehanan sa pagahimuon nila nga aksyon.

Ingon ana diay na? Maghuwat pa diay kita og adunay moreklamo? Dili tingali husto ang gihimo sa PROBE. Kun kini maoy atong paundayonan, moabot ang higayon nga mahitabo na usab nga mahanaw ang usa ka karsada kay mapuno na sa kabalayan.

Nahinumdom ba kamo sa Rallos Street diha sa Barangay Suba nga nahanaw na kay giukopar sa mga mapahimuslanon ug gitukoran og kabalayan?

Ang tukma g’yud unta sa mga sakop sa PROBE mao nga kutob sa ilang makita nga illegal structures, diha-diha nila kini nga panggub-on. Tan-awa ninyo kanang eskena Panganiban ug Colon.

Bakante na nga luna kaniadto apan karon gikoral na, semento pa g’yud. Lakip ang aseras giapil sa pagkoral. Nakabantay ba ang PROBE niana? Kaniadto, ang demolition team sa City Hall nga gitawag og SPEED wala ‘sab makasanta sa pagtukod og illegal structure sa aseras sa T. Padilla ug Sikatuna.

Tan-awa kun makaagi ka pa ba sa aseras sa T. Padilla dapit sa eskena Sikatuna. Kaniadto makalakaw ka pa diha apan kay gipasagdan man lang sa SPEED, mao na kana ang gisangpotan sa pagka karon.

Angayan g’yud nga sila si Raquel Arce ug Wendel Cenas molihok g’yud, dili kay maghuwat lang nga adunay moreklamo usa pa sila moaksyon. Maayo unta og makasabot na ang PROBE sa ilang trabaho aron mahapsay na ang atong dakbayan.

Kun gamiton lang nila ang ilang mga mata, makita sa PROBE nga daghan kaayo ang angay’ng aksyonan.