EDITORYAL – Hakog og mga puwesto
Husto g’yud si Cebu City Fire Marshall Rogelio Bongabong Jr. sa pag-awhag nga palapdan ang mga interior roads sa kabarangayan aron sayon ra nga makasulod ang mga fire trucks kon adunay moulbo nga sunog.
Daghan nga mga karsada nga nahimutang sa lainlaing kabarangayan sa dakbayan sa Sugbo ang gisugyot ni Bongabong nga palapdan. Apan lisod kini nga himuon gawas lang kon masunog ang mao nga dapit.
Sa pagpalapad sa mga karsada may mga pamilya nga masakripisyo kay mogamay man pagbalik ang ilang puwesto. Nakapahimulos na sa kaharohay kini’ng mao nga mga pamilya diha nga gipalapad nila ang ilang kabalayan ngadto sa karsada, ug sigurado nga dili na sila gusto nga moatras pa.
Ang ubang tag-iya og balay-patigayon migamit usab sa sapa alang sa ilang negosyo ug sigurado’ng makig-away kini sila aron nga dili gub-on ang ilang estraktura nga anaa sa kasapaan. Apan ang balaod gamhanan kon ang atong mga opisyal aduna lay kaisog sa pagpapatuman. Isog ang atong mga opisyal kon ihiklin usa nila ang kahakog sa pwesto.
Apan tan-awa ang lapad na kaayo nga bahin sa Barangay Kamagayan nga gipangguba ang kabalayan gikan sa dalan D. Jakosalem aron sukdon pag-usab ug bahin-bahinon sa angay nga gidak-on, dili ba nindot?
Kon ingon niini ang atong ipatuman diha sa mga siot nga lugar dinhi sa dakbayan, ang resulta monindot ang atong dakbayan sa umaabot nga katuigan. Apan kinahanglan nga bantayan na g’yud pag-ayo kadto’ng hakog og mga puwesto nga dili na makapangabuso.
- Latest