EDITORYAL - Kuwang ang termino

Usa sa mga ilhanan sa mga maayong lider mao ang kamubo sa iyang termino bisan nakompleto pa niini ang tibuok unom ka tuig nga mandato. Dinhi sa Pilipinas, unom lang ka tuig ang termino sa usa ka presidente base sa nalatid sa 1986 Constitution.

Kadtong mga presidente nga dili maayo ang pagkadumala sa nasud dili kaayo anugonan ang katawhan kun sila mailisan mas grabe pa kun ang presidente wa g’yud nahimo nga maayo sa nasud, paspas kaayo sama sa nahitabo kang kanhi presidente Joseph Estrada nga nakombikto pa gani sa kaso.

Ang mga maayong modumala sagad kuwangon gyud sa ilang panahon tungod sa kadaghan sa ilang nakitang mahimo pa ug nasugdang mga proyekto ug programa nga wala pa nila mahuman ug kinahanglan pang sugdan.

Estilo man gud sa politika sa Pilipinas nga ang unang duha ka tuig ma-busy ang midaog sa paggukod niadtong ilang mga kaatbang ug mga kahiwian sa gisundan nilang administrasyon.

Sa ikatulo ug ikaupat nga tuig, anha pa sila magsugod-sugod sa pagpatuman sa ilang mga gipangsaad sa ilang plataporma atol sa kampanya.

Sa ikalima ug sa kataposan tuig sa ilang termino magsugod na ang kisaw sa mosunod nga eleksyon ug ma-busy na ang tanan hasta ang ilang kabinete sa pagpangandam ug pagpili sa ilang mga manok.

Mao kini ang hinungdan nga usahay uwahi na ang tanan alang sa usa ka matarong nga lider pagtuman sa tanan niyang mga panaad.

Unta ang mosunod nga lider dili na mag usik-usik pa sa ilang panahon sa pagpokus og gukod sa ilang mga kontra aron di makatilaw ang katawhan sa bunga sa ilang panaad.