Dumpit gikonbikto

Nasubo ko pagkasayod nga gikonbikto sa hukmanan si SPO1 Adonis Dumpit tungod sa pagpusil niya sa usa ka Ronron Go didto sa Barangay Tejero pipila ka tuig na ang milabay.

Dili man gud abusado nga pagkatawo si Dumpit ug imposible nga pusilon ra niya kadto si Ronron Go kun tan-aw niya wala kini makahimo og salaod. Natural lang nga gikonbikto siya sa pagpatay ni Ronron kay mora’g nabuko-buko kini pagka-igo.

Nasuta sa husay sa kaso didto sa korte nga pagresponde ni Dumpit sa usa ka pagpanulis, nakit-an niya si Ronron ug laing kauban nga mitukma sa pamahayag sa biktima sa tulis. Pagkakita ni Ronron nga nagsingabot si Dumpit, ilado kaayo nga polis nga iyang silingan, mihana kini pagdagan.

Gipasalbahan pa apan mitalikod ug nagpanikad na pagdagan ug atol nga nakablit ni Dumpit ang armas. Matud sa korte nga samtang nangangkon ang polis nga “self defense” ang pagpusil niya ni Ronron, apan wala kini masuportahe og ebidensya.

Buyno, ingon gayud niini ang panerbisyo. Sama ra kanamo nga mga sakop sa media nga adunay posibilidad nga tungod sa wala’y kukahadlok nga pagbulgar sa matuod, dili usab imposible nga mabilanggo kami kun mamatud-an nga nakalapas sa balaod nga libel.

* * *

Ang warden sa Cebu City Jail nga si Superintendent Johnson Calub miingon nga posible ‘sab nga dunay iyang mga jail officers nga nagbantay sa mga piniriso nga nalambigit sa pagpayuhot og gidili nga drugas sa bilanggoan.

Apan hinuon, gitataw ni Calub nga samtang dili kini imposible apan tuyoon kaayo kini. Iyang gihulagway nga ang mga jail officers kawani sa nasudnon nga kagamhanan, sama sa mga polis, ug sigurado sila nga kun masakpan mataktak g’yud sa serbisyo.

Usa kini sa gibasihan ni Calub nga samtang dili imposible nga adunay iyang mga jail officers nga nalambigit pagpayuhot og shabu ngadto sa mga piniriso, apan dako ang posibilidad nga      wala.

Mga professional kuno ang mga sakop sa Bureau of Jail Management and Penology (BJMP) ug nagtuo siya nga kadaghanan kanila mahadlok nga mohimo’g binuang kay kun ila kini’ng himuon bugti sa gamay nga kantidad, anugon ang ilang serbisyo kun sila ma-dismiss.

Buyno, posible ‘sab. Apan ngano lagi nga makasulod man ang shabu diha sa bilanggoan? Kun tinuod man ang “alibi” sa ubang guwardiya nga ang drugas ilabay ra kuno pasulod sa bilanggoan gikan sa gawas sa koral, dili kaha maayo nga kadtong mosulod sa mata’g selda rekisahon na ‘sab?