Kinsa ni sila Joel?
Daghang misaway ni Talisay City Mayor Johnny V. De Los Reyes kay nanghatag kuno og kuwarta ngadto sa mga sakop sa media.
Apan naluoy ko sa ubang sakop sa media nga gipamuyboy sa usa ka ginganlan og Joel nga taga Talisay, kay kuno dagko og kaon ug sirok.
Mas maayo baya nga hinganlan ang maong mga sakop sa media nga gidaot ni Joel, kay sa akong bahin kaduha ra ko kaanha sa City Hall sa Talisay sa miagi’ng tuig kay may tuyo ko sa akong anak nga anaa sa Engineering Department.
Ang akong usa ka anak nagmaestra usab sa San Roque Elementary School kay sukad sa 1980 hangtod 1992 nakapuyo kami sa Sitio Laray, Barangay San Roque, Talisay sa wala pa kami mobalhin sa Pardo.
Tungod kay didto magdako sa Talisay ang akong mga anak didto usab sila manarbaho hangtod karon ug giisip nako nga ang Talisay suod kaayo sa akong kasing-kasing.
Maoy hinungdan nga mabalaka kita kun unsay mahitabo sa maong siyudad kay anaa manginabuhi ang duha lang nako ka anak.
Sukad matukod ang City Hall sa Talisay wala ako makasulod sa opisina sa mayor ug sa mga kosehal gikan sa panahon ni kanhi Mayor Soc Fernandez ug hangtod karon sa panahon ni Mayor JVR.
Maayo unta nga nganlan ang taga media nga nagpasaway aron nga dili mapagan ang tanan.
* * *
- Latest
