Pag-unlad at pagganda ng Maynila

SA loob lang ng isang taon ng pamumuno ni Mayor Joseph “Erap” Estrada sa Maynila ay sunod-sunod na ang mga ipinatupad niyang hakbangin sa pag-unlad at pagganda ng lungsod.

Pinangunahan niya ang pagsasagawa ng mga job fair, medical missions, livelihood programs, mga pangkulturang exhibit, film showing at konsiyerto at pagkilala at parangal sa mga natatanging indibiduwal mula sa iba’t ibang propesyon at sektor laluna sa senior citizens at mga pampublikong empleyado.

Nagpa-install din siya ng 185 closed-circuit television (CCTV) camera sa mga istratehikong lugar sa lungsod para mapigilan ang kriminalidad at mas epektibong      mapangasiwaan ang trapiko.

Ginawa niyang episyente ang koleksiyon ng buwis kaya nakalikom ng sapat na pondo para pangtustos sa mga gastusin ng lokal na pamahalaan at sa mga serbisyo-publiko; isinulong ang pagtatayo ng mga waiting shed na may libre pang internet Wi-Fi connection; itinaguyod ang serbisyong pangkalusugan na prayoridad na bene-pisyaryo ang mga maralita tulad ng pagtatatag ng Manila Dialysis Center, pagpapaayos ng Ospital ng Tondo at iba pa; ipinursige ang paggamit ng mga matipid at environment-friendly na electricity-powered tricycle sa pakikipagtulungan ng Asian Development Bank (ADB); isinaayos ang ruta at biyahe ng mga delivery truck; at siyempre ay pinamunuan din niya ang masaya at makabuluhang foundation day ceremonies ng lungsod at ang Miss Manila pageant.

Matatandaang sinabi ni Erap noon sa kanyang kampanya na ‘Ibabalik natin ang ganda, kinang at kaunlaran ng Maynila. Dear Manileños, I will not fail you. I was born in Manila, and I will die working to bring back the glory and pride to Manila.”

Ayon sa mga residente ng lungsod, sa maikling panahon pa lang ay nakikita at nararamdaman na nila ang pagtupad ni Mayor Erap sa mga ipinangako nito. Dahil dito umano ay lalo pa nilang pag-iibayuhin ang suporta at pakikipagtulungan kay Mayor Erap laluna’t positibo umano ang kanilang pananaw na matutupad na ngayon ang matagal na nilang pangarap na tunay na pag-unlad at pagganda ng Maynila.