Pari nagmisa, way kinabuhi

Hunyo 13, 2014. Biyernes sa alas 3:30 sa hapon, mitambong ko’g misa sa Pilgrim Center sa Basilica del Sto. Niño Minore. Ganahan kaayo ko motambong sa mga misa-nobena dinhi kay ang mga pari bug-at mopadangat-paambit sa ilang homily. Madutlan gyud ka sa ilang pagpahiamgo.

Apan nakurat ko dihang ang mimisa sa maong adlaw sa nahisgotang oras, usa ka pari nga klaro kaayong wala makapangandam sa unsay iyang isulti pag-abot sa akto sa homily. Dugay siyang nakasugod sa paghubad sa pasumbingay nga giasoy sa ebanghelyo. Putol-putol ang iyang mga pulong. Dugay makasumpay. Nagsige’g pakli-pakli sa bibliya. Ang-ang nagbasa. Ang-ang nagsag-ulo.

Ingles, Tagalog ug binisaya ang pinulongan nga iyang gigamit. Hapit motrayenta minutos ang iyang pagwali, diin tungod sa kahinay sa dagan sa iyang sinultihan, imbes maalerto ang nanimba, giduka hinuon.

Nadismaya ko. Abi nako’g makadungog na sab ko’g himsog nga wali sa pari nga giisip kong tambal sa akong pagka-makasasala. Abi ko’g hiwaon niya akong kasingkasing aron hugasan sa kalinis ang gitaliti kong kalag. Apan napakyas ko. Kay imbes limpiyohan niya ako sa buling, gipun-an man hinuon. Tiaw bay, bisa’g giunsa nako’g paminaw iyang wali, wa gyud ko’y nasabtan?

Hangyo lang. Nindot unta nga ang misa-nobena matag Biyernes sa Sto. Niño Basilica Pilgrim Center dili mantinira’g pari nga di kamaong motisok sa mga pulong sa Diyos ngadto sa kasingkasing sa mga nanimba. Mga makasasala, intawon mi, Padre, uy? Busa, tabangi mi nga pinaagi sa imong espirituhanong homily, kaming tanan maluwas. Di ba ang mga pulong sa Ginoo mao man ang suga sa among kinabuhi ug kalan-on sa among kalag? Dan...ipabati kini kanamo!