Nasaan?

Nasaan ang ating mga kabataan

na sabi ni Rizal: Pag-asa ng bayan?

Sila ba’y naroon sa loob ng bahay

o nagkalat ngayon sa mga lansangan?

Nasaan ang ating mga estudyante

Marunong mag-aral hanggang hatinggabi?

sila ba ay handa na laging magsilbi’t

Sa mga magulang sila’y makaganti?

Nasaan ang ating mabubuting pulis

at mga bumberong trabaho’y malinis?

Sila ba ay handang buhay ay mapatid

na walang padulas silang iniisip?

Nasaan ang ating mga abogado

na hustisya lamang hangad na manalo?

At dahil magaling mambilog ng ulo

tinatanggap lamang mayamang may kaso?

Nasaan ang ating experts na weatherman

bakit sila ngayon ay nag-aalisan?

Mga sweldo nila bakit kapraso lang

parang bingi yata ang pamahalaan?

Nasaan din ngayon mga binibini

na ayaw pahipo kahit na daliri?

Kapag nakamit mo pag-ibig na tangi

hanggang sa libingan kayo’y magkatabi?

Nasaan din ngayon ang mga binata

na handang mamatay para sa diwata?

Sila kung magmahal napakadakila

pag-ibig ay tapat hanggang kay Bathala?

Nasaan ang bansang dati ng huwaran

hindi natatakot sa mga kalaban?

Kung ngayo’y may lahing gusto’y makalamang

lahing Pilipino handa sa bakbakan?