Kaluoy sa kahoy

Tungod sa pagpalapad sa dalan Serging Osmeña sa North Reclamation Area gikinahanglan sa Department of Public Works and Highways ang pagkuha sa mga kahoy nga kapin sa usa ka gatos ka punoan nga nagbarog sa tungang bahin sa nahisgotang dalan. Aron makuha ang mga kahoy, ang Department of Public Works and Highways nangayo og pagtugot sa Department of Environment and Natural Resources pinaagi sa Community Environment and Natural Resources Office nga mihatag usab sa iyang pagtugot ubos niining mosunod nga kondisyon. Una, ang kahoy dili pamutlon kun dili pangibton ubos sa pagtan-aw sa Cebu City Parks and Playgrounds Commission ug sa DENR 7. Ikaduha, ang naibot nga mga kahoy itanom sa Mahiga Creek, San Pedro Calungsod Shrine ug ubang dapit nga matamnan. Ikatulo, ang DPWH kinahanglan nga moilis og usa ka gatos ka semilya sa matag kahoy nga mamatay ug sa pagtanom niini sa mga dapit nga itudlo kanila sa DENR.

Apan nagpangagot ang ngipon ni Konsehal Nida Cabrera ug Bise Mayor Edgardo Labella, Mayor Mike Rama ug mga konsehal sa dakbayan sa Sugbo tungod kay wala man tuod pamutla ang kahoy apan gipangbugha na ang sanga niini ug gihimong sugnod. Kun wala pa masakpi labing seguro ang punoan sa mga kahoy gipanghimo nga uling. Ang Earth balling mahimo na untang Earth uling. Walay puangod ang nagpasipala sa mga kahoy.

Ang DPWH nanghunaw sa gidangatan sa mga kahoy samtang ang kontraktor nga WT nagpagoryogoryo apan dihang nakita sa CCTV camera ang ilang heavy equipment nga maoy nangibot sa mga kahoy wala na kini makalihay ug nangayo og higayon nga makapasabot ngadto sa kagamhanan sa dakbayan sa Sugbo kinsa nanganti nga aduna gayoy papanubagon sa pagpanamastamas sa mga kahoy.

Samtang nangayo og higayon nga makapasabot sa kagamhanan sa dakbayan sa Sugbo, ang kontraktor sa pagpalapad sa dalan Serging Osmeña nga si Willy Tee dili pa makatubag kun asa ibutang ang ubang punoan sa kahoy kay ang nakit-an mao pa lamang ang mga sanga nga gipangbugha ug gihimong sugnod.