Pagpuyo sa bakak
Uyon ko sa bisan unsang lakang pagpausbaw sa inadlaw’ng kita sa mga drayber sa public utility jeepneys (PUJs). Wa sab koy supak sa mga paningkamot sa PUJ operators pagpalambo sa kita sa ilang mga sakyanan. Maong apil unta ko sa labing unang mohangop ning ilang petisyon alang sa uminto sa plitehan.
Apan pasayloa nga di ko makapaluyo sa petisyon. Kay gipasikad ni sa dakong bakak. Di lang usa kon dili duha gyud ka bakak:
Di tinuod nga P7.50 ang minimum nga plitehan nga ilang gikolekta gikan sa mga pasahero karon; ug
Labawng di tinuod nga ang uminto sa plitehan mosangpot nga mas bag-o ug mas hamugaway nang PUJs ang managan.
* * *
Ang pait nga kamatuoran mao nga P8 na ang gikolekta nga plitehan karon. Salamat sa kanihit sa 25 sentabos nga sensiyo, wa nay drayber nga manukli ug wa nay pasahero nga maningil og sukli nga P0.50. Bisan sa mga sugyot niadto nga mandoan ang mga drayber pagbawon og daghang sensiyo, nagtuo ko nga mas makiangayon nga ang mga pasahero maoy mag-andam og sensiyo alang sa tukma nilang plitehan.
Apan labihang hasola pagpangita og sensiyo. Gawas pa, ug mao ni tinuod nga gihunghong sa akong kasingkasing, wa na lang motukol ang mga pasahero kay ganahan sab sila nga madugangan ang mada sa mga drayber ngadto sa ilang pamilya.
* * *
Gipatuo sa transport groups nga ang ilang petisyon pinasikad sa makuti nga pagtuon. Nga ilang gikuwenta hangtod sa kataposang usa ka dako ang inadlaw’ng kita sa mga drayber, ilang abangan sa PUJ ug ang gasto sa operators sa mga piyesa, ligid, baterya ug ubang sangkap sa ilang operasyon.
Sa ato pa, namakak na silang daan sa pag-awhag nga P2.50 ang labing makiangayon nga usbaw sa minimum nga plitehan. Kay nahibawo sila nga sayop nang daan ang P7.50 nga sukaranan sa ilang pagpangayo nga himuong P10 ang minimum nga plitehan. Unsaon man nato pagsalig sa mga pundok nga namakak sa sinugdanan pa lang?
* * *
Lain nilang pamakak mao ang pagpasabot nga mas modako ang ilang gasto sa pagpatuman sa lagda sa Land Transportation Franchising and Regulatory Board (LTFRB) nga mas bag-o ug mas hamugaway nang PUJs ang pasubayon sa mga ruta.
Ang pait nga kamatuoran mao nga daghan ang PUJs ang di unta angay nga tugotan nga makapamasahero--mora ka nang magyaka sa kaubos sa mga lingkoranan, kinahanglan kang magduko tungod sa kamubo sa atop ug kinahanglang magpa-injection og anti-tetanus kay tayaon ang kaha ug mga kuptanan. Nagpapating sa ilang kalapasan ang transport groups ug inutil ang LTFRB pagbadlong nila. Nahadlok ko nga di mahunong kining nangalisbo nilang binuang bisan kapila pa pausbawan ang minimum nga plitehan.
* * *
- Latest
