Dalan sa Guadalupe giguba, basi’g di mapahiuli

Daplin sa dalan V. Rama sugod eskina Banawa paingon Guadalupe, gisugdan na’g guba. Dinha’y nag-uniporme’g sweet shirt nga yellow gisukna ko unsang ahensiyaha sa gobiyerno ang misamad-ukal sa aspaltadong karsada? Matud niya sa pinayanghag nga tingog: “Sa DPWH mi. Project kini ni Mayor Rama.”

Wa na lang nako siya pangutan-a unsay ilang ilubong sa gibungkal nilang yuta. Basin imbornal para sa good drainage, maoy akong pangagpas. Total, proyekto gud ni sa gobiyerno. Segurado gyud nga makaayo sa katawhan ang tumong niini. Ang dili lang segurado mao: “Kun mahibalik ba sa orihinal nga kahamis ang aspaltadong dapit nga ilang gihilabtan?”

Base man gud sa atong namatikdan, kutob sa nindot nga dalan nga giguba sa bisan unsang ahensiya sa gobiyerno, di gyud kini tarongon sa pagpahiuli. Kun dili bugdo, lupyak ang pagkatrabaho. Ang pait, kana gyung dili na aspaltuhon. Pasagdan na lang ang maong dapit nga mahimong libaong. Sakita sa dughan, uy!

Pareha sa nahitabo sa karsada sa Banawa nga giguba sa MCWD kay dunay tubo sa tubig nga giayo. Pagkahuman nila’g gamit sa maong lugar, ila man tuod nga gisemento’g balik, pero dili na patag. Ug di na pud hamis! Wala na mabalik ang kanhi guwapa niining hitsura. Gansang-gansangon na’g nawong. Naa pa ra ba gyud sa tungatunga sa dalan. Ang ligid way kalikayan. Mauntol ug moagunto gyud!

Ug mao nay gikahadlokan sa katawhan. Labi na kadtong mag-agian niining karsadaha. Kay basi’g ang nahitabo sa dalan sa Banawa, mao poy dangatan sa karsada sa Guadalupe.

Kuhiton lang nato daan ang  taga DPWH ug hangyoon, nga please... ibalik intawon ninyo ngadto sa orihinal nga katahom ang dalan human ninyo’g gamit. Buwahan, malipayon gihapon ang mga drayber ug pasahero sa nagkalainlaing sakyanan nga makapadayon sa pagpahimulos niini. Makalaom ba kami, Mayor Mike?