Congrats Engr. Arenas–ang Cebuano inventor

Karon  pa  diay  makaamgo  si Mayor Mike  Rama nga di maayo  nga ipatrabaho  og  adlaw nga dako ang  mga  karsada  ning  dakbayan.

Dugay na  kaayo  nga nagkonsimisyon  ang  kadaghanan  niini  apan  tungod  kay  wa may  mayor  nga  naminaw  kanila  kaniadto, aw siyempre wa gyud  sila’y  nahimo.

May  ordinansa na man  diay  ang  siyudad  kalabot  niini  nga  nahimo  sa konseho  niadtong  tuig 2007, ugaling wala lang gipatuman.

Maayo baya  tingale  nga  matag  karon  ug  unya,  ang  mayor  gyu’y  mosuway  sa  mga butang  nga nakapaugtas  sa publiko  buwahan to dali ra kaayong  makahimo og lakang nga  matagad dayon  sa kagamhanan.

* * *

Ning panahon  nga  misaka  ang  gidaghanon sa  mga  kriminal  nga mogamit  na  og  mga  sophisticated  nga  ekipo ug  mga  hinagiban  sa pagpatay, gikinahanglang  di  usab  angay  magpalupig  ang  kagamhanan.

Usa  sa labing  epektibo  karon  nga  kasangkapan  sa pag-ila  ug  pagtumbok  sa  mga  kriminal  mao  ang  closed circuit television (CCTV). Sa matag  lugar  nga  daghan  ang  tawo, anaa  usab  ang  daghan  nga  krimin.

Busa  labing  gikinahanglan  usab  nga  padaghanon  sa matag lungsod  ug  siyudad  ang  CCTV  sa ilang  lugar.

Ang  usa  ka  lokal  nga  kagamhanan  nga  wa  niini, basin  alalay  siya  sa mga  kriminal?

Hinuon  bisan  mailhan na ang  kriminal  apan daghan  og  alalay  nga  manalipod  kaniya,  aw di  gyud  hikit-an  ug  hidakpan  bisan  may patong  pa nga  minilyon  ka pesos  ang  ulo. Usa  niini  mao  si Ruben Ecleo kinsa  napriso dinhi  sa Sugbo  kaniadto  ug karon nahanaw  lang daw aso.

* **

Daghan kaayong  mga  Filipino  nga nahimong  inventor  ug  kahimanan  nga  napahimuslan  sa  tawo  sa tibuok  kalibotan.

Apan  sa kadugay  na nga  naimbento  sa  sakyanan, karon  lang  madiskubrehi  ang  pagpakusog  sa  sakyanan  nga menus  ra  og  konsumo  sa gasoline. Gani  usa   ka Sugboanon  nga  enhinyero nga wa pa  kaayo’y  nakasuway  sa  iyang  invention.

Apan  ang Espada  nga  misuway  niini,  nakasuta gyud nga gawas  nga makadaginot  ka  sa konsumo  sa gasoline, limpyo  ang aso  sa imong  sakyanan, ug  kusog  pa  modagan, di ka magmahay  ug  angay  kining  sagupon  sa tibuok  kalibotan.

Congrats Engr. Joselito Z. Arenas, ug  kontaka lang  ninyo  Ang Espada kun gusto  mo  nga mosuway  sa iyang  invention  ilabi  na  sa  mga  motorista.