EDITORYAL - Botika sa champ
Dalaygon ang gihimo sa kagamhanan sa Dakbayan sa Sugbo paghatag og libre nga tambal ngadto sa kaliboan ka kabus nga pamilya nga mga lumulopyo ug botante dinhi sa siyudad.
Kapin sa P20 Milyones ang gigahin matag tuig alang sa gitawag og City Hospitalization Assistance and Medicine Program (CHAMP) diin ang mga kabus makapahimulos og P25,000 nga kantidad sa tambal ug ubang serbisyo kun anha sila ma-admit sa Cebu City Medical Center.
Kun ang kabus nga lumolupyo dili maadmit sa CCMC, makapahimulos gihapon siya og P5,000 nga kantidad sa mga tambal. Apan daghan ang nahasol pag-ayo kaniadto kay ang CHAMP walay kaugalingong botika.
Kadtong gusto nga moangkon og libre nga tambal kinahanglan pa nga moadto sa tulo ka gagmay’ng botika nga dili hitsas sa mga tambal ug nahimutang layo sa CCMC.
Sa laktud, dugang kahasol ang masinati sa mga kabus nga ang uban maglakaw ra gani pag-adto sa botika apan igo ra nga balibaran kay walay stock sa gikinahanglang mga tambal.
Dalaygon ang gihimo sa CHAMP nga imbis adto sila mokuha og tambal sa mga pribadong botika, sila na ang nangumpra og mga tambal ug personal nga mohatag ngadto sa nanginahanglan.
Barato pa ang kantidad sa tambal nga ilang mapalit nga direkta gikan sa suppliers.
- Latest